Monday, August 04, 2008

കണ്ണീരില്‍ കുതിര്‍ന്ന അരങ്ങേറ്റം(പരന്പര ഭാഗം രണ്ട്)

മുപ്പതു വര്‍ഷങ്ങള്‍ക്കു മുന്‍പ്‌ ഒരു സന്ധ്യ. ശ്രീകൃഷ്‌ണപുരം ഈശ്വരമംഗലം ക്ഷേത്രത്തില്‍ ഇന്ന്‌ ഒരു കഥകളി അരങ്ങേറ്റമുണ്ട്‌. സ്വീഡന്‍കാരന്‍ ടോം ജെര്‍ദേഫാക്കാണ്‌ കഥാനായകന്‍. സായ്‌പ്പിന്‍െറ '`ആട്ടം' കാണാന്‍ വന്‍ജനാവലി ക്ഷേത്രപരിസരത്ത്‌ തടിച്ചുകൂടിയിരിക്കുന്നു.വളരെ ചുരുങ്ങിയ കാലം കൊണ്ട്‌ അഭ്യസിച്ച '`പൂതനാമോക്ഷം' അരങ്ങിലെത്തിക്കാന്‍ പോകുന്ന ടോമിനെ അണിയിച്ചൊരുക്കാനുള്ള തയ്യാറെടുപ്പിലാണ്‌ ഗുരു ബാലകൃഷ്‌ണന്‍.


ശ്രീകൃഷ്‌ണപുരത്തുകാര്‍ `നമ്പൂതിരിമാഷ്‌'എന്നുവിളിക്കുന്ന നെടുമ്പിള്ളിമന നാരായണന്‍ നമ്പൂതിരി നിറഞ്ഞ മനസോടെ സമീപത്തുതന്നെയുണ്ട്‌. ആഴ്‌ച്ചകളോളം തന്‍െറ വീട്ടില്‍ കുടുംബാംഗത്തെപ്പോലെ കഴിഞ്ഞ, താന്‍ മകനെപ്പോലെ സ്‌നേഹിച്ച വിദേശയുവാവ്‌ ആട്ടവിളക്കിനുമുന്നില്‍ പൂതനാമോക്ഷം അവതരിപ്പിക്കുമ്പോള്‍ ആ മനസ്‌ തുടിക്കാതിരിക്കുന്നതെങ്ങനെ?.


അരങ്ങുണരാന്‍ മിനിറ്റുകള്‍ മാത്രമാണ്‌ ബാക്കി. പെട്ടെന്ന്‌ ചമയപ്പുരയില്‍ ഒരു തേങ്ങലുയര്‍ന്നു. കാര്യമറിയാതെ ചുറ്റുപാടും നോക്കിയവര്‍ കണ്ടത്‌ ഒരു കൊച്ചു കുട്ടിയെപ്പോലെ കരഞ്ഞുകൊണ്ട്‌ നാരായണന്‍ നമ്പൂതിരിയുടെ മുന്നില്‍ നില്‍ക്കുന്ന ടോമിനെയാണ്‌. എല്ലാവരും സ്‌തബ്‌ധരായി നില്‍ക്കുമ്പോള്‍ ടോം നമ്പൂതിരിയുടെ കരം ഗ്രഹിച്ചുകൊണ്ട്‌ പറഞ്ഞു.


``മാപ്പ്‌.... എനിക്ക്‌ മാപ്പു തരണം..... ഞാന്‍ നിങ്ങളെ തെറ്റിധരിച്ചു. ഈ നിമിഷംവരെ ഞാന്‍ തെറ്റിധാരണകളുടെ ലോകത്തായിരുന്നു. നിങ്ങള്‍ എന്നെ കബളിപ്പിക്കുമെന്നു ഞാന്‍ ഭയന്നു. ഇപ്പോള്‍ എല്ലാം ബോധ്യമായി. അങ്ങു വലിയ മനുഷ്യനാണ്‌. സ്‌നേഹിക്കാന്‍ മാത്രമറിയാവുന്ന മുനുഷ്യന്‍''.


ആര്‍ക്കും ഒന്നും മനസിലായില്ല. ടോമിനും നമ്പൂതിരിക്കും ഒഴികെ. ഹൃദയം വിങ്ങുകയായിരുന്നെങ്കിലും നമ്പൂതിരി വികാരമടക്കി. അദ്ദേഹത്തിന്‍െറ കൈത്തലങ്ങള്‍ ടോമിന്‍െറ കണ്ണീരുവീണു നനഞ്ഞു. വിറയാര്‍ന്ന കരങ്ങള്‍ ടോമിന്‍െറ ശിരസില്‍ വച്ച്‌ അദ്ദേഹം പറഞ്ഞു


``എനിക്ക്‌ ദുഃഖമില്ല. ടോം മനസു തകരാതെ വേദിയല്‍ കയറൂ. പൂതനാമോക്ഷം തകര്‍ക്കട്ടെ''


കണ്ണീരു തുടച്ച്‌, ദുഃഖം കടിച്ചമര്‍ത്തി ടോം അരങ്ങിലെത്തി. പൂതനാമോക്ഷം ഗംഭീരമായി. അവസാന ഭാഗത്ത്‌ കൃഷ്‌ണന്‍ ചോരകുടിക്കുമ്പോള്‍ പതിവുപോലെ പ്രാണവേദനയില്‍ പിടയുന്ന പൂതനയെ പ്രതീക്ഷിച്ചിരുന്നവര്‍ക്കു തെറ്റി. ആട്ട വിളക്കിനു മുന്നില്‍ ടോമിന്‍െറ പൂതന പൊട്ടിച്ചിരിച്ചു. ഉറക്കെ ഉറക്കെ ചിരിച്ചുകൊണ്ടേയിരുന്നു. ആസ്വാദകര്‍ അമ്പരന്നു. ചിലര്‍ ക്ഷുഭിതരായി. വേദിക്കരികിലുണ്ടായിരുന്ന നമ്പൂതിരിമാഷും ടോമിന്‍െറ ഗുരുവുമൊക്കെ സ്‌തബ്‌ധരായി.


അരങ്ങില്‍ നിന്നിറങ്ങിവന്നപ്പോള്‍ ഗുരുവും നമ്പൂതിരിയുമൊക്കെ സായ്‌പ്പിന്‌ എന്തുപറ്റിയെന്ന്‌ ആരാഞ്ഞു. ടോമിന്‍െറ മറുപടി കേട്ട്‌ അവര്‍ വീണ്ടും ഞെട്ടി.'``സര്‍വ്വം മറന്ന്‌ ആടുമ്പോള്‍ സാക്ഷാല്‍ ഭഗവാന്‍ കൃഷ്‌ണനെ ഞാന്‍ കണ്‍മുന്നില്‍ കണ്ടു. ഭഗവല്‍ദര്‍ശനത്തിന്‍െറ ആനന്ദമൂര്‍ഛയില്‍ ചിരിക്കാനല്ലാതെ കരയാന്‍ കഴിയുന്നതെങ്ങനെയാണ്‌''?




(ചിത്രത്തിന് കടപ്പാട്www.tug.org.in)

ടോം കളി ഗംഭീരമാക്കിയതിനേക്കാള്‍ നമ്പൂതിരി മാഷിനെ സന്തോഷിപ്പിച്ചത്‌ ചമയപ്പുരയിലെ പശ്ചാത്താപമാണ്‌. ടോമിന്‍െറ കണ്ണീരില്‍ മാഷിന്‍െറ മനസ്സിലെ വലിയ ദുഃഖംകൂടിയാണ്‌ അലിഞ്ഞ്‌ ഇല്ലാതായത്‌.നെടുമ്പിള്ളി മനയില്‍ വന്ന ദിവസം മുതല്‍ ടോം ആ കുടുംബത്തിലെ ഒരംഗത്തെപ്പോലെയായിരുന്നു. നമ്പൂതിരിയുടെ മക്കളുമായി അടുത്തിടപഴകി, അവിടുത്തെ നാടന്‍ ഭക്ഷണം കഴിച്ച്‌ സംതൃപ്‌തനായി കഴിയുമ്പോഴും അയാള്‍ സംശയാലുവായിരുന്നു. ഇന്ത്യക്കാര്‍, പ്രത്യേകിച്ച്‌ മലയാളികള്‍ ദുരാഗ്രഹികളും കളളന്‍മാരുമാണെന്ന്‌ വിശ്വസിക്കുന്ന ചില വിദേകളുടെ ഗണത്തിലായിരുന്നു ടോമും. അതുകൊണ്ടു തന്നെ പുത്രതുല്യം തന്നെ സ്‌നേഹിക്കുന്ന നമ്പൂതിരിയെയും കുടുംബത്തെയും പൂര്‍ണമായി വിശ്വസിക്കാന്‍ അയാള്‍ക്കു കഴിഞ്ഞില്ല.


കുളിക്കാന്‍ പുറത്തുപോകുമ്പോള്‍ പാസ്‌പോര്‍ട്ടും പഴ്‌സും ടോം കൈവശം കരുതും. കഥകളി പഠനം തുടരുമ്പോഴും നമ്പൂതിരിയും ഗുരുവുമൊക്കെ തന്നെ കബിളിപ്പിക്കുമോ എന്ന സംശയം അയാള്‍ക്കുണ്ടായിരുന്നു. ടോമിന്‍െറ പ്രവൃത്തികളില്‍നിന്ന്‌ ഇക്കാര്യം മനസ്സിലാക്കിയ നമ്പൂതിരി ആത്‌മാര്‍ത്ഥത തെളിയിച്ച്‌ മറുപടി നല്‍കാന്‍ തീരുമാനിച്ചു. അനുഭവത്തിലൂടെ വസ്‌തുതകകള്‍ മനസിലാക്കിയപ്പോള്‍ ടോമിന്‍െറ മനസ് മാറുകയായിരുന്നു.


നിറഞ്ഞ മനസോടെ യാത്ര പറയുമ്പോള്‍ താന്‍ ഇനിയും വരുമെന്ന്‌ ടോം പറഞ്ഞു. പക്ഷെ പിന്നീടൊരിക്കലും അയാള്‍ വന്നില്ല. കുറെ കത്തുകളും ആശംസാകാര്‍ഡുകളും സ്വീഡന്‍െറ തലസ്‌ഥാനമായ സ്‌റ്റോക്ക്‌ഹോമില്‍ നിന്നും വന്നുകൊണ്ടിരുന്നു. വര്‍ഷങ്ങള്‍ കഴിഞ്ഞപ്പോള്‍ ആ ബന്ധം പൂര്‍ണ്ണമായി നിലച്ചു.പിന്നീട്‌ ഒരുപാടു വിദേശികള്‍ നെടുമ്പിള്ളി മനയുടെ പടികടന്നുവന്നു. അവിടെ താമസിച്ച്‌ കേരളീയ കലകള്‍ അഭ്യസിച്ചു. ഒരേസമയം ഏഴു വിദേശികള്‍ വരെ മനയുടെ മകള്‍നിലയിലെ മുറിയില്‍ താമസിച്ചിരുന്ന കാലമുണ്ടായിരുന്നു.(തുടരും)

Sunday, August 03, 2008

മരണമുഖത്തുനിന്നുള്ള കുറിപ്പുകള്‍- പരന്പര ഒന്നാം ഭാഗം


ഞാന്‍ ഭക്ഷണം വേണ്ടെന്നു വെക്കുകയാണ്‌.

ഇത്‌ എന്‍റെ ഇഷ്ടമല്ല,

പക്ഷെ മനസ്സ്‌ ആവശ്യപ്പെടുന്നു.

``ഈ നിമിഷം എല്ലാം അവസാനിപ്പിക്കുക''.

എവിടെ നിന്നോ ഒരു സ്വരം എന്റെ കാതുകളില്‍ മുഴങ്ങുന്നു.

`` ഒരു മനുഷ്യനായിരിക്കാന്‍ നീ മറക്കരുത്‌.

പൊട്ടിച്ചിരിക്കാനും സ്വയം ആസ്വദിക്കാനും മറക്കരുത്‌.

സ്‌നേഹിക്കാനും, സഹ ജീവികളുടെ

കണ്ണുകളിലെ പ്രകാശം കാണാനും മറക്കരുത്‌.

സര്‍വോപരി ഒരു മനുഷ്യനായിരിക്കാന്‍ നീ മറക്കരുത്‌.

അപ്പോള്‍ മാത്രമെ നിന്‍റെ നീതി നേടാനും

ലക്ഷ്യത്തിലെത്താനും നിനക്കു കഴിയൂ''.

ഇത്‌ ഒരു കാല്‍പ്പനിക രചനയല്ല. 1995 ഓഗസ്റ്റ്‌ 13ന്‌ കശ്‌മീര്‍ താഴ്‌വരയിലെ പന്‍സമുല്ല-സാലിയ റോഡില്‍ ചത്ത്‌ഹാല്‍ ഗ്രാമത്തില്‍ കണ്ടെത്തിയ ശിരസ്‌ ഛേദിക്കപ്പെട്ട ശരീരത്തിലെ വസ്‌ത്രങ്ങളില്‍നിന്ന്‌ കണ്ടെടുത്ത മുഷിഞ്ഞ തുണ്ടുകടലാസുകളിലെ കുറിപ്പുകളിലൊന്നാണ്‌. ഭീകരരുടെ ഒളിത്താവളത്തില്‍ മരണം മുന്നില്‍ കണ്ട്‌ കഴിയുന്ന നിമിഷങ്ങളില്‍ നോര്‍വെക്കാരാനായ ഒരു ചെറുപ്പക്കാരന്‍ കുത്തിക്കുറിച്ച വരികള്‍.

എഴുത്തുകാരനും നാടകനടനും സംവിധായകനുമൊക്കെയായിരുന്ന ഹാന്‍സ്‌ ക്രിസ്‌ത്യന്‍ ഓസ്‌ട്രോ എന്ന 27 കാരന്റെ ജീന്‍സിന്‍റെ പോക്കറ്റിലും ഷര്‍ട്ടിന്‍റെ മടക്കുകളിലുമൊക്കെ കണ്ടെത്തിയ മുഷിഞ്ഞ കടലാസു തുണ്ടുകളില്‍ നോര്‍വീജിയന്‍ ഭാഷയില്‍ വികൃതമായ കൈപ്പടയിലാണ്‌ കുറിച്ചിരുന്നത്‌. ഒരുപക്ഷെ എഴുതുമ്പോള്‍ കൈകള്‍ കെട്ടപ്പെട്ടിരുന്നിരിക്കാം. അല്ലെങ്കില്‍ ഏതെങ്കിലും ഇരുട്ടറയിലിരുന്നാകാം അയാള്‍ ഇതൊക്കെ കുറിച്ചത്‌. കടലാസുകള്‍ തീര്‍ന്നപ്പോള്‍ എഴുതിയതെന്ന്‌ തോന്നുന്ന ചില വരികള്‍ ജീന്‍സിന്‍റെ ചില ഭാഗങ്ങളിലുമുണ്ടായിരുന്നു.

ഇന്ത്യന്‍ സംസ്‌കാരത്തോടനുള്ള അഭിനിവേശവും മോഹഭംഗത്തിന്‍റെ വേദനയും വിധിയെ നേരിടാനുള്ള തയാറെടുപ്പുമൊക്കെയായിരുന്നു ഹാന്‍സിന്‍റെ അവസാനത്തെ കുറിപ്പുകളുടെ ഉള്ളടക്കം. ഒപ്പം ഇനിയൊരിക്കലും കാണാനാകാത്ത വാത്സല്യ മാതാവിനും കുഞ്ഞുപെങ്ങള്‍ക്കും ഓരോ കത്തുകളുമുണ്ടായിരുന്നു.

പാലക്കാടു ജില്ലയിലെ ശ്രീകൃഷ്‌ണപുരത്ത്‌ കഥകളി അഭ്യസിച്ച്‌, വലിയൊരു സ്വപ്‌നം സാക്ഷാത്‌കരിച്ചതിന്‍റെ ആഹ്ലാദവുമായി നാട്ടിലേക്ക്‌ മടങ്ങും മുമ്പ്‌ കശ്‌മീരിലേക്കു നടത്തിയ വിനോദയാത്രക്കിടെയാണ്‌ ഹാന്‍സിന്‍റെ ജീവിത നാടകത്തിന്‌ നിനച്ചിരിക്കാതെ തിരശ്ശീല വീഴ്‌ത്തിയത്‌. 1995 ജൂലൈ നാലിനും എട്ടിനുമിടയില്‍ കശ്‌മീര്‍ താഴ്‌വരയില്‍നിന്ന്‌ നിരവധി വിദേശ വിനോദസഞ്ചാരികളെ അല്‍-ഫാറന്‍ തീവ്രവാദികള്‍ തട്ടിക്കൊണ്ടുപോയി. അവശനിലയിലായ പലരെയും വിട്ടയച്ചെങ്കിലും ഹാന്‍സ്‌ ഉള്‍പ്പെടെ ആറു പേരെ ബന്ദികളാക്കി. തടവില്‍ കഴിയുന്ന ചില തീവ്രവാദികളെ മോചിപ്പിക്കണമെന്നതായിരുന്നു ഭീകരരുടെ ആവശ്യം.

വാഷിംഗ്‌ടണിലെ സ്‌പൊകെയ്‌നിലുള്ള വിഖ്യാത ന്യൂറോ സൈക്കോളജിസ്റ്റ്‌ ഡൊണാള്‍ഡ്‌ ഹച്ചിന്‍സ്‌, മറ്റൊരു അമേരിക്കക്കാരന്‍ ജോണ്‍ ചില്‍ഡ്‌സ്‌, ബ്രിട്ടീഷുകാരായ കീത്ത്‌ മാന്‍ഗന്‍, പോള്‍ വെല്‍സ്‌, ജര്‍മനിയില്‍നിന്നുള്ള ദിര്‍ക്‌ ഹാസെര്‍ട്ട്‌ എന്നിവരാണ്‌ ഹാന്‍സിനൊപ്പം ബന്ദികളായത്‌. ജൂലെ ഒമ്പതിന്‌ തീവ്രവാദികളുടെ കണ്ണുവെട്ടിച്ചു മുങ്ങിയ ജോണ്‍ ചില്‍ഡ്‌സിനെ സൈന്യത്തിന്‍റെ നിരീക്ഷണ ഹെലികോപ്‌റ്റര്‍ രക്ഷപ്പെടുത്തി.


ഹാന്‍സും മറ്റ് ബന്ദികളും അല്‍-ഫാറന്‍ തീവ്രവാദികളുടെ താവളത്തില്‍(തീവ്രവാദികള്‍ പുറത്തുവിട്ട ചിത്രം).


ആവശ്യം അംഗീകരിക്കാന്‍ സര്‍ക്കാര്‍ വിസമ്മതിച്ചതിനെ തുടര്‍ന്നാണ്‌ തീവ്രവാദികള്‍ ഹാന്‍സിനെ ശിരഛേദം ചെയ്‌തത്‌. ഇന്ത്യയില്‍ മരിച്ചു വീണാല്‍ അത്‌ ഭാഗ്യമായി കരുതുമെന്നു പറഞ്ഞ്‌ കേരളത്തില്‍നിന്ന്‌ മടങ്ങിയ ഹാന്‍സിന്‍റെ വാക്കുകള്‍ അറംപറ്റുകയായിരുന്നു.

ഹാന്‍സിന്‍റെ ജീവിതത്തിന്‍റെ ഗതി മാറിയതിനും ഇന്ത്യയില്‍ വന്നതിനും പിന്നിലുള്ള പ്രധാന പ്രേരക ശക്തി ശ്രീകൃഷ്‌ണപുരത്തെ നെടുമ്പിള്ളി മനയില്‍ താമസിച്ച്‌ കഥകളി പഠിച്ച ആദ്യ വിദേശിയായ ടോം ജെര്‍ദേഫാക്കായിരുന്നു. അതുകൊണ്ടുതന്നെ ഹാന്‍സിന്‍റെ ജീവിത കഥയില്‍ ടോം ഒരു പ്രധാന കഥാപാത്രമാണ്‌ (തുടരും)

ഹാന്‍സ് ക്രിസ്ത്യന്‍ ഓസ്ട്രോ- പരന്പര തുടങ്ങുന്നു






പാലക്കാട്‌ ജില്ലയിലെ ശ്രീകൃഷ്‌ണപുരത്ത്‌ കഥകളി പഠിച്ച്‌, നാട്ടുകാരുടെ പ്രിയപ്പെട്ട ഹംസം തിരുമേനിയായി മാറിയ നോര്‍വെയില്‍നിന്നുള്ള 27കാരന്‍ ഹാന്‍സ്‌ ക്രിസ്‌ത്യന്‍ ഓസ്‌ട്രോയുടെ ശിരഛേദം ചെയ്യപ്പെട്ട മൃതദേഹം കശ്‌മീര്‍ താഴ്‌വരയിലെ ചത്ത് ഹാല്‍‍ ഗ്രാമത്തില്‍ കണ്ടെത്തിയിട്ട്‌ ഈ മാസം 13ന്‌ 23 വര്‍ഷം തികയുന്നു. പത്രങ്ങളില്‍ വന്ന ചെറിയ വാര്‍ത്തകള്‍ക്കപ്പുറം ഹാന്‍സിനെക്കുറിച്ച്‌ അറിയാനുള്ള ആഗ്രഹമാണ്‌ ഏതാനും വര്‍ഷം മുന്‍പ്‌ എന്നെ ശ്രീകൃഷ്‌ണപുരത്ത്‌ എത്തിച്ചത്‌.

പിന്നീട്‌ ഹാന്‍സിന്‍റെ അമ്മ മാരിറ്റ്‌ ഹെസ്‌ബിയും സഹോദരി ആനറ്റും കൊച്ചിയില്‍ വന്നപ്പോള്‍ അവരോട്‌ സംസാരിക്കാനും അവസരം ലഭിച്ചു. അവിസ്‌മരണീയമായ ഒരു അന്വേഷണ യാത്രയുടെ വിശദാംശങ്ങള്‍ ഉള്‍ക്കൊള്ളുന്ന പരമ്പര ഹാന്‍സിന് സ്‌മരണാഞ്‌ജലിയെന്നോണം ഇതാദ്യമായി പ്രസിദ്ധീകരിക്കുന്നു.
(ചിത്രങ്ങള്‍ക്ക് വിവിധ പ്രസിദ്ധീകരണങ്ങളോടും വെബ്സൈറ്റുകളോടും കടപ്പാട്)

Monday, June 09, 2008

മുസഫര്‍ അഹമ്മദിന്‍റെ 'മരുഭൂമിയുടെ ആത്മകഥ'






മാധ്യമ പ്രവര്‍ത്തകനായ വി. മുസഫര്‍ അഹമ്മദിന്‍റെ സൗദി അറേബ്യന്‍ യാത്രാവിവരണ പുസ്തകം മരുഭൂമിയുടെ ആത്മകഥ തൃശൂര്‍ കറന്‍റ് ബുക്സ് പ്രസിദ്ധീകരിച്ചു.

യാത്രാവിവരണത്തിന്‍റെ പതിവു ശൈലികളില്‍നിന്ന് വിഭിന്നമായി മരുഭൂമിയുടെ സമസ്ത ഭാവങ്ങളുടെയും മണല്‍ക്കാട്ടിലെ ജീവിതങ്ങളുടെയും നേര്‍ക്കാഴ്ച്ചകളും യാത്രയിലെ അനുഭവങ്ങളും വായനക്കാരന് ആസ്വാദ്യകരമായി പകര്‍ന്നു നല്‍കുന്നതില്‍ ഇവിടെ എഴുത്തുകാരന്‍ വിജയിച്ചിരിക്കുന്നു.

മരുഭൂമിയില്‍നിന്നുള്ള അപൂര്‍വ ഫോട്ടോകളും ഒ.ബി. നാസറിന്‍റെ രേഖാ ചിത്രങ്ങളും പുസ്തകത്തെ കൂടുതല്‍ ആകര്‍ഷകമാക്കുന്നു.
വില-80 രൂപ.

പുസ്തകത്തില്‍ ലോകത്തിലെ ഏറ്റവും വലിയ മണല്‍ മരുഭൂമി എന്നറിയപ്പെടുന്ന റുബുല്‍ ഖാലി(എംടി ക്വാര്‍ട്ടര്‍)യെക്കുറിച്ച് വിശദീകരിക്കുന്ന അധ്യായത്തിന്‍റെ ആദ്യ ഭാഗം ചുവടെ

ആഴങ്ങളില്‍ കുളിച്ച്‌
ഉപരിതലത്തിലുറക്കം

ലോകത്തിലെ ഏറ്റവും വലിയ മണല്‍ മരുഭൂമി എന്നറിയപ്പെടുന്ന റുബുല്‍ ഖാലിയുടെ (എംറ്റി ക്വാര്‍ട്ടര്‍- മരുഭൂമികളില്‍ വലുപ്പത്തില്‍ ഒന്നാം സ്ഥാനത്ത്‌ സഹാറയാണ്‌. അവിടെ പക്ഷെ റുബുല്‍ഖാലിയിലുള്ളയത്ര മണല്‍ക്കുന്നുകള്‍ sand dunes ഇല്ലെന്ന്‌ പുസ്‌തകങ്ങളില്‍ പറയുന്നു).
പടിഞ്ഞാറന്‍ തുഞ്ചത്ത്‌ എത്തിയപ്പോള്‍ മേലുദ്ധരിച്ച അറബ്‌ പഴമൊഴി ഓര്‍ത്തു പോയി. വിജന ശൂന്യതയുടെ നിഗൂഡതയില്‍ മണല്‍ക്കുന്നുകള്‍ വിരുന്നുകാരാ, ഇവിടെ വീട്ടുകാരനായി കൂടിക്കൊള്ളൂ എന്നു പറയുകയാണെന്ന്‌ തോന്നി.
തമ്പടിച്ച്‌ പാര്‍ക്കാന്‍ ഏത്‌ സഞ്ചാരിയേയും റുബുല്‍ ഖാലി നിത്യവും വിളിച്ചു കൊണ്ടിരിക്കുന്നു. സാഹസികരായ എത്രയോ മനുഷ്യര്‍ ഈ മരുഭൂമിയുടെ രഹസ്യങ്ങള്‍ തേടി പോയിട്ടുണ്ട്‌. എല്ലാവര്‍ക്കും ലക്ഷ്യം കാണാന്‍ പറ്റിയിട്ടുണ്ടാവില്ലെന്ന്‌ ഇതിന്‍റെ കിടപ്പ്‌ കണ്ടാലറിയാം.
ആഴങ്ങളില്‍ കുളിച്ച്‌ ഉപരിതലത്തിലുറങ്ങുന്ന മീന്‍ കൂട്ടങ്ങളെപ്പോലെയാണ്‌ റുബുല്‍ ഖാലി വിശ്രമിക്കുന്നത്‌. പുഴയിലും കടലിലും ഓളങ്ങളുടെ തള്ളലില്‍ ഞെട്ടിയുണര്‍ന്ന്‌ പാഞ്ഞു പോകുന്ന മീന്‍ കൂട്ടങ്ങളെപ്പോലെ കാറ്റില്‍ മണല്‍ക്കുന്നുകളും ചിതറിയോടുന്നു.
മണല്‍ക്കുന്നുകളുടെ പള്ളയില്‍ ചവിട്ടി നടക്കുമ്പോള്‍ തിരിച്ചെടുക്കാന്‍ പറ്റാത്ത വിധം കാലുകള്‍ പൂണ്ടു പോകും. മണല്‍ക്കുന്നുകള്‍ ചിലയിടത്ത്‌ കോട്ടകള്‍ പോലെ. പലയിടത്തും ഒഴുകാന്‍ തുടങ്ങി മരവിച്ചു പോയ ജലവിഭ്രാന്തി പോലെ.
അല്‍പ്പം വെള്ളമൊഴുകിയാല്‍ തീര്‍ച്ചയായും കടലിനെ നിസ്സാരമാക്കാന്‍ എനിക്കു കഴിയുമെന്ന്‌ റുബുല്‍ ഖാലി പറഞ്ഞു കൊണ്ടിരിക്കുന്നു. കാറ്റിന്റെ അമ്പില്‍ ഒന്നിനു പിറകെ ഒന്നായി ആര്‍ത്തലച്ച്‌ കുതിക്കുമ്പോള്‍ ഇത്‌ കടല്‍ തന്നയല്ലേയെന്ന്‌ ആരും ഒരിട ശങ്കിച്ചു പോകും. തോണി പോലെ അല്‍പ്പം ചെരിഞ്ഞും ആടിയും നീങ്ങുന്ന ഒട്ടകപ്പുറത്ത്‌ മരുഭൂമിയില്‍ മനുഷ്യന്‍ സഞ്ചരിക്കുന്നത്‌ കടല്‍ അനുഭവത്തില്‍ നിന്നായിരിക്കണം. മരുക്കപ്പല്‍ എന്നാണല്ലോ ഒട്ടകത്തിന്റെ വിശേഷങ്ങളില്‍ ഒന്ന്‌.
സൗദി അറേബ്യ, ഒമാന്‍, യു.എ.ഇ, യെമന്‍ എന്നീരാജ്യങ്ങളില്‍ പടര്‍ന്നു കിടക്കുന്ന റുബുല്‍ ഖാലിയുടെ വലുപ്പം 65,00,00 ചതുരശ്ര കിലോ മീറ്ററാണ്‌. ആയിരം കിലോ മീറ്റര്‍ നീളത്തിലും 500 കിലോ മീറ്റര്‍ വീതിയിലുമാണ്‌ മണല്‍ക്കുന്നുകള്‍ നീണ്ടു നിവര്‍ന്നു കിടക്കുന്നത്‌. ഈ പ്രദേശത്ത്‌ വേനല്‍ക്കാലത്ത്‌ (ജൂണ്‍-ജൂലൈ മാസങ്ങളില്‍) 126 ഡിഗ്രിഫാരന്‍ ഹീറ്റാണ്‌ താപനില. മഞ്ഞു കാലത്ത്‌ താപനില മൈനസ്‌ 12 വരെ എത്താറുണ്ടെന്നാണ്‌ കണക്ക്‌. ലോകത്തില്‍ ഏറ്റവും കൂടുതല്‍ എണ്ണ നിക്ഷേപമുള്ളതും ഈ മരുഭൂ വിജനതയില്‍ തന്നെ.
റുബുല്‍ഖാലിയോട്‌ ചേര്‍ന്ന്‌ ഏറ്റവും കൂടുതല്‍ ജനവാസമുള്ളത്‌ സൗദി-യെമന്‍ അതിര്‍ത്തിയിലാണ്‌.
നിരവധി ഗ്രാമങ്ങളില്‍ ബദവികള്‍ എന്നു വിളിക്കുന്ന മരുഭൂമിയിലെ ആദിമഗോത്രക്കാരുടെ പിന്‍തുടര്‍ച്ചക്കാര്‍ ഇന്നും കഴിയുന്നു. ആടിനേയും ഒട്ടകത്തേയും മേച്ച്‌, കൃഷി ചെയ്‌ത്‌. ഇത്തരത്തിലുള്ള ഗ്രാമങ്ങളില്‍ ബദവികളുടെ തൊഴിലാളികളായി ജോലി ചെയ്യുന്ന മലയാളികളേയും കാണാം. മണല്‍ക്കാട്ടിലെ നിത്യ സഹവാസം കൊണ്ടായിരിക്കണം അവരുടെ മലയാളി മുഖങ്ങള്‍ മാഞ്ഞു പോയിരിക്കുന്നു. ബദവികളുടെ വേഷത്തില്‍, അവരുടെ മുഖഛായകളിലേക്ക്‌ ഈ കുടിയേറ്റക്കാര്‍ പരിവര്‍ത്തിക്കപ്പെട്ടിരിക്കുന്നു. മലയാളം തീരെ ഉപയോഗിക്കാന്‍ അവസരമില്ലാത്തതിനാല്‍ മാതൃഭാഷയും അവരില്‍ നിന്ന്‌ അകന്നിട്ടുണ്ട്‌. ഇടക്ക്‌ മലയാളി കടകളുള്ള തൊട്ടടുത്ത അങ്ങാടികളില്‍ പോകുമ്പോഴാണ്‌ അവര്‍ സ്വന്തം ഭാഷ വീണ്ടെടുക്കുന്നത്‌. വര്‍ഷങ്ങളായി നാട്ടില്‍ പോകാതെ കഴിയുന്ന പലരുടേയും കഥകള്‍ ഇവിടെ നിന്ന്‌ കേള്‍ക്കാനായി.
സൗദി അറേബ്യയുടെ തെക്ക്‌ പടിഞ്ഞാറ്‌ കിടക്കുന്ന നജ്‌റാനില്‍ നിന്നും 360 കിലോ മീറ്റര്‍ അകലെയുള്ള യെമന്‍ അതിര്‍ത്തിയായ ശറൂറയില്‍ എത്തിയാണ്‌ റുബുല്‍ ഖാലിയുടെ കന്യകാ മണല്‍ക്കുന്നുകള്‍ കണ്ടു തുടങ്ങിയത്‌. നജ്‌റാന്‍-ശറൂറ റൂട്ടില്‍ 21 കിലോ മീറ്റര്‍ കഴിഞ്ഞാല്‍ റുബുല്‍ ഖാലിയുടെ തുടക്കമായി. ഇവിടെ മണലിന്‌ വെളുത്ത നിറമാണ്‌. കുന്നുകള്‍ അധികമില്ലാത്ത മണല്‍ സമതലമാണിത്‌. 80 കിലോ മീറ്റര്‍ കഴിഞ്ഞാല്‍ പതുക്കെ, പതുക്കെ മണലിന്‍റെ നിറം മാറിത്തുടങ്ങുന്നു. കാവി നിറത്തിലുള്ള മണല്‍ക്കുന്നുകളും തൊട്ടു പിന്നാലെ പ്രത്യക്ഷപ്പെടും. ഇവിടെ നിന്നും തലയുയര്‍ത്തിനില്‍ക്കുന്ന ആ മോഹിനിയെ തൊട്ടു തുടങ്ങാം.
റുബുല്‍ഖാലിയോട്‌ ചേര്‍ന്നുള്ള ഗ്രാമങ്ങളില്‍ താമസിക്കുന്ന ബദവികള്‍ തോക്കുധാരികളാണ്‌. മരുഭൂമിയില്‍ ഇടക്കിടെ പ്രത്യക്ഷപ്പെട്ട്‌ കാലികളെ കൊന്നു തിന്നുന്ന ചെന്നായ്‌ക്കളേയും മറ്റും കണ്ടാല്‍ വെടിവെച്ചു വീഴ്‌ത്താനാണിത്‌. മലമ്പാമ്പുകളും ചിലപ്പോള്‍ പ്രത്യക്ഷപ്പെടാറുണ്ടെന്ന്‌ പറയുന്നു. അത്തരത്തില്‍ ഒറ്റക്ക്‌ മരുഭൂമിയില്‍ ഒരു ബദവിയെക്കണ്ടാല്‍ പറയേണ്ട വാക്കുകള്‍ നജ്‌റാനിലെ ചങ്ങാതി പഠിപ്പിച്ചിരുന്നു. ഗവ്വിത്തു (നീ വളരെ ശക്തനായിരിക്കട്ടെ) എന്ന്‌ ബദവി പറയും. തിരിച്ച്‌ നജീത്തു (നീ പറഞ്ഞതില്‍ എന്റെ വിജയം) എന്നാണ്‌ പറയേണ്ടത്‌. അതോടെ അയാള്‍ തോക്കു താഴ്‌ത്തി വന്ന്‌ കെട്ടിപ്പുണരും..........................

Monday, December 24, 2007

അടുപ്പില്‍ അവസാനിച്ച ക്രിസ്മസ് കരോള്‍

ഡിസംബറെന്നു കേള്‍ക്കുമ്പോഴേ മനസൊന്നു തുള്ളിച്ചാടും.
അത്‌ പണ്ടേയുള്ള ഒരു ദൗര്‍ബല്യമാണ്‌. കുളിരാര്‍ന്ന പ്രഭാതങ്ങള്‍,
നക്ഷത്രങ്ങള്‍ കണ്ണു ചിമ്മുന്ന രാത്രികള്‍, ഇരവിനെ പകലാക്കുന്ന ആഘോഷങ്ങള്‍... ഇതൊക്കെ ഓര്‍ക്കുമ്പോള്‍ തുള്ളാത്ത മനവും തുള്ളിപ്പോകും.

ക്രിസ്മസ്‌ കരോള്‍ എന്നൊരു കലാപരിപാടിയെക്കുറിച്ച്‌ പലര്‍ക്കും അറിയാമായിരിക്കും. കരോള്‍ എന്നാല്‍ ഗാനം, സംഗീതം എന്നൊക്കെയാണ്‌ അര്‍ത്ഥം. വിളവെടുപ്പു പോലെയുള്ള ആഘോഷ പരിപാടികളോടനുബന്ധിച്ച്‌ നടത്തിയിരുന്ന സംഗീതാഘോഷമാണ്‌ ആദ്യകാലത്ത്‌ കരോള്‍ എന്ന്‌ അറിയപ്പെട്ടിരുന്നത്‌. ആളുകള്‍ വൃത്താകൃതിയില്‍ കൂടി നിന്ന്‌ പാടിയിരുന്ന പാട്ടുകള്‍ക്ക്‌ ഫ്രഞ്ച്‌ ഭാഷയില്‍ കരോളര്‍ എന്നാണ്‌ പറഞ്ഞിരുന്നത്‌ ഇത്‌ ലോപിച്ച് കരോള്‍ ആയെന്നാണ് പറയപ്പെടുന്നത്. ക്രിസ്മസുമായി ബന്ധപ്പെട്ട കരോള്‍ പ്രചാരത്തിലായത്‌ 13ആം നൂറ്റാണ്ടിലാണെന്നാണ്‌ ചരിത്രം.

ക്രിസ്മസ്‌ കാലത്ത്‌ നമ്മുടെ നാട്ടില്‍ പലതരം കരോളുകള്‍ നടക്കാറുണ്ട്‌. കരോള്‍ മത്സരങ്ങള്‍ക്കും പഞ്ഞമില്ല. ജിംഗിള്‍ ബെല്‍സ്.., മേരീസ്‌ ബോയ്‌ ചൈല്‍ഡ്‌.., സൈലന്‍റ് നൈറ്റ്‌... തുടങ്ങിയ വിഖ്യാത ക്രിസ്മസ്‌ ഗാനങ്ങള്‍ക്ക്‌ ഇന്നും ഒട്ടേറെ ആരാധകരുണ്ടെങ്കിലും സിനിമാ ഗാനങ്ങളുടെ ക്രിസ്മസ്‌ പാരഡികള്‍ക്കാണ്‌ കേരളത്തില്‍ കൂടുതല്‍ ജനപ്രീതി. ഇക്കാര്യത്തില്‍ ഞങ്ങളുടെ നാടും വ്യത്യസ്തമല്ല.

ക്രിസ്മസിന്‌ ആഴ്ച്ചകള്‍ക്കു മുമ്പേ നാട്ടില്‍ പല സംഘങ്ങളും കരോള്‍ പരിശീലനം തുടങ്ങും. അത്യധ്വാനം ചെയ്ത്‌ കരോള്‍ ഗാനങ്ങള്‍ എഴുതി ചിട്ടപ്പെടുത്തുന്നവര്‍ ഏറെയുണ്ടെങ്കിലും ഹിറ്റ്‌ സിനിമാ പാട്ടുകള്‍ തെരഞ്ഞെടുത്തശേഷം വരികളില്‍ ഉണ്ണീശോ, പുല്‍ക്കൂട്‌, കന്യാ മറിയം, നക്ഷത്രം തുടങ്ങിയ വാക്കുകള്‍ കയറ്റി (ഇന്‍റര്‍നെറ്റും ഈമെയിലും മൊബൈല്‍ ഫോണുമൊക്കെ ചേര്‍ത്ത്‌ തമിഴ്‌ സിനിമാ പാട്ടുകള്‍ ഉണ്ടാക്കുന്നതുപോലെ)സംഗതി ഒപ്പിച്ചെടുക്കുന്നവരും കുറവല്ല. ഇത്തരം പാരഡി കരോള്‍ പാട്ടുകളുടെ പുസ്തകങ്ങളും ഇപ്പോള്‍ വിപണിയില്‍ സുലഭമാണ്‌.

വീട്ടില്‍നിന്ന്‌ അധികം ദൂരെയല്ലാതെ മൂന്ന്‌ പള്ളികളുണ്ട്‌. പെന്തക്കോസ്ത്‌, സാല്‍വേഷന്‍ ആര്‍മി, സി.എസ്‌.ഐ എന്നീ വിഭാഗങ്ങളുടേത്‌. ഈ പള്ളികളില്‍ കരോളിനുവേണ്ടി എല്ലാ വര്‍ഷവും ചിട്ടയോടെയുള്ള തയാറെടുപ്പുകള്‍ നടത്തിയിരുന്നു. അതുകൊണ്ടുതന്ന അവരുടെ പാട്ടുകള്‍ വളരെ മികച്ചതായിരുന്നു. ഡിസംബര്‍ രണ്ടാം വാരം മുതല്‍ രാത്രികാലങ്ങളില്‍ അവരുടെ റിഹേഴ്സലുകള്‍ കേട്ട്‌ കിടക്കുമ്പോള്‍ ഉള്ളില്‍ ക്രിസ്മസ്‌ ആഘോഷത്തിന്‍റെ പെരുമ്പറ മുഴങ്ങുമായിരുന്നു.

പള്ളികള്‍ക്കു പുറമെ സംഘടനകളും ക്ളബുകളും(സാങ്കല്‍പികമാകാം) ഒക്കെ കരോള്‍ സംഘടിപ്പിക്കാറുണ്ട്‌. ഇതിനെ മാന്യമായ ഒരു രാത്രികാല പിരിവ്‌ പരിപാടിയായി കണ്ടിരുന്നവരും കുറവല്ല. രണ്ടു ഡ്രമ്മുകളും ഒരു പെട്രോ മാക്സും ഉണ്ടെങ്കില്‍ ആര്‍ക്കും കരോള്‍ നടത്താം. അല്‍പ്പം മോടി കൂട്ടണമെങ്കില്‍ സാന്താക്ളോസിന്‍റെ വേഷം കെട്ടിയ ഒരാളെ മുന്നില്‍ നിര്‍ത്താം. മുളന്തണ്ടുകൊണ്ട്‌ ഉണ്ടാക്കി, വര്‍ണ കടലാസ്‌ ഒട്ടിച്ച്‌, അകത്ത്‌ മണ്ണെണ്ണ വിളക്ക്‌ വെച്ച ഒരു നക്ഷത്രം തീവെട്ടി പോലെ പിടിക്കാനുണ്ടെങ്കില്‍ സംഗതി ഉഷാര്‍. അച്ചടി മഷി ഉണങ്ങാത്ത രസീത്‌ പുസ്തകം അനിവാര്യം.

സാധാരണ കരോള്‍ സംഘങ്ങളുടെ പര്യടനം ഡിസംബര്‍ 23 മുതല്‍ 25 വരെയുള്ള രാത്രികളിലാണ്‌. പിരിവ്‌ മാത്രം ഉദ്ദേശിക്കുന്നവരാണെങ്കില്‍ 23നു തുടങ്ങി, പുതുവത്സരം വരെ ആവാം(യേശു പിറന്ന വിവരം പരമാവധി ആളുകളെ അറിയിക്കണമല്ലോ?). വാറ്റു മുതല്‍ സ്കോച്ചുവരെയുള്ള 'ഇന്ധന'ങ്ങളുടെ ഊര്‍ജ്ജത്തില്‍ മുന്നേറുന്ന സംഘങ്ങളും ഇല്ലാതില്ല. ഇത്തരം 'കലാകാരന്‍മാര്‍'ക്കായി ഇടക്ക്‌ ഏതെങ്കിലും താവളത്തില്‍ രാത്രി ഭക്ഷണവും ക്രമീകരിക്കും. ഓരോ ദിവസത്തെയും പാട്ടു കഴിഞ്ഞാല്‍ ഡ്രമ്മിന്‍റെയുംപെട്രോ മാക്സിണ്റ്റെയും വാടക കഴിഞ്ഞുള്ള തുക തലയെണ്ണി വീതിക്കും. ആര്‍ക്കും സ്വന്തം വീട്ടുകാരോട്‌ സമാധാനം പറയേണ്ട, പോലീസിനെ പേടിക്കേണ്ട; എല്ലാം ഉണ്ണിയേശുവിനു വേണ്ടി-അത്യുന്നതങ്ങളില്‍ ദൈവത്തിനു സ്തുതി. ഭൂമിയില്‍ സന്‍മനസുള്ളവര്‍ക്ക്‌ സമാധാനം!

തല്ലിക്കൂട്ട്‌ സംഘങ്ങളുടെ പക്കല്‍ പാരഡി പാട്ടുകള്‍ പോലും സ്റ്റോക്ക്‌ ഉണ്ടാവില്ല. പിന്നെയോ? വായില്‍ വരുന്നത്‌ കോതക്ക്‌ പാട്ട്‌. "ഒരീശോ രണ്ടീശോ മൂന്നീശോ നാലീശോ അഞ്ചാറീശോ...."(ഏക്‌ ദോ തീന്‍... എന്ന പാട്ടിന്‍റെ ഏറ്റവും എളുപ്പത്തിലുള്ള കരോള്‍ രൂപം) തുടങ്ങിയ നിമിഷ സൃഷ്ടികളായിരിക്കും ഇക്കൂട്ടര്‍ തട്ടിവിടുക.

കരോള്‍ സംഘങ്ങള്‍ ഒറിജിനലാണെങ്കിലും തല്ലിക്കൂട്ടാണെങ്കിലും വെറുംകയ്യോടെ തിരിച്ചയക്കുന്നത്‌ മര്യാദയല്ലല്ലോ. പണ്ടൊക്കെ രണ്ടു രൂപ മുതല്‍ അഞ്ചു രൂപവരെയാണ്‌ കൊടുത്തിരുന്നത്‌. പിന്നീട്‌ അത്‌ പടിപടിയായി ഉയര്‍ന്ന്‌ അടുത്ത കാലത്ത്‌ അമ്പതു രൂപ വരെയായി. കൂടുതല്‍ പാട്ടു പാടിച്ച്‌ വന്‍ തുക കൊടുത്ത്‌ ഹുങ്ക്‌ കാട്ടിയിരുന്ന പുതുപ്പണക്കാരും ഒരുകാലത്ത്‌ ഉണ്ടായിരുന്നു.

കരോള്‍ സംഘത്തിന്‍റെ കൊട്ടു കേള്‍ക്കുമ്പോള്‍ ഞങ്ങള്‍ കൂട്ടികള്‍ പിടഞ്ഞെണീക്കും; അവരെ വരവേല്‍ക്കാന്‍. അത്രക്കുണ്ടായിരുന്നു അന്നത്തെ ക്രിസ്മസ്‌ ജ്വരം.
മാത്രമല്ല പിറ്റേന്ന്‌ അയല്‍പക്കത്തെ കുട്ടികള്‍ ചോദിക്കും
''നിങ്ങളെ വീട്ടില്‍ ഇന്നലെ എത്ര കരോളുകാര്‍ വന്നു?''
എണ്ണം കുറഞ്ഞുപോയാല്‍ നാണക്കേടാണ്‌. ക്രിസ്മസ്‌ അവധി കഴിഞ്ഞ്‌ ചെല്ലുമ്പോള്‍ ആരുടെ വീട്ടിലാണ്‌ ഏറ്റവും കൂടുതല്‍ കരോള്‍ സംഘങ്ങള്‍ വന്നതെന്ന്‌ സഹപാഠികള്‍ക്കിടയിലും ഒരു കണക്കെടുപ്പുണ്ടാകും.

കരോള്‍ സംഘത്തിന്‍റെ പെട്രോമാക്സ്‌ വെളിച്ചം ഏതു ദിശയിലാണ്‌ നീങ്ങുന്നതെന്നറിയാന്‍ ജനലരികില്‍ കാത്തുനില്‍ക്കുമ്പോള്‍ പിതാശ്രി പറയും.
"വഴിയെ പോകുന്നോരെ വിളിച്ചുകേറ്റാതെ പോയിക്കെടന്ന്‌ ഒറങ്ങു പിള്ളാരെ. ഇനീം പെറുക്കാന്‍ എന്‍റെ കയ്യില്‍ കാശില്ല"

എന്തുപറഞ്ഞാലും അപ്പന്‍റെ കയ്യില്‍ എന്തെങ്കിലും ഇല്ലാതിരിക്കുമോ? ഒടുവില്‍ കരോള്‍ സംഘം വീട്ടിലേക്കുള്ള വഴിയില്‍ കയറുമ്പോള്‍ അകത്തെ ഇരുട്ടില്‍ വീണ്ടും അപ്പന്‍റെ സ്വരം

"എണ്റ്റെ കയ്യിലുള്ള കാശ്‌ തീര്‍ന്നു. അവര്‍ക്ക്‌ രണ്ടു രൂപാ കൊടുത്താ മതി".

"അതു മോശാ...ആ ഉലുവാ ടിന്നിനകത്തൂന്ന്‌ പത്തു രൂപയെടുത്തു കൊട്‌...."കട്ടിലില്‍നിന്ന്‌ എഴുന്നേല്‍ക്കുന്നതിനിടെ മാതാശ്രി പറയും.

ആശ്വാസമായി. ഞങ്ങള്‍ ഇരുട്ടില്‍തന്നെ അടുക്കളയിലേക്ക്‌ കുതിക്കും. അമ്മയുടെ താല്‍ക്കാലിക ഖജനാവു കൂടിയായ ഉലുവാ ടിന്നിന്‍റെ ഹൃദിസ്ഥമാണ്‌.കതകു തുറന്ന്, രൂപ കയ്യില്‍ പിടിച്ച്‌ തെല്ലു ഗമയില്‍ ഞാന്‍ വാതില്‍ പടിയില്‍ നില്‍ക്കും. രണ്ട്‌ പാട്ടാണ്‌ സാധാരണ പാടുക. രണ്ടാമത്തെ പാട്ടു തുടങ്ങുമ്പോള്‍ സംഘത്തിലെ പണപ്പിരുവാകാരന്‍ മുന്നോട്ടു വരും ഞാന്‍ രൂപാ അയാള്‍ക്ക്‌ നീട്ടും. അയാള്‍ തിരിച്ച്‌ രസീതും.

ദാ... ന്നു പറയും മുമ്പ്‌ പരിപാടി കഴിയും. കരോള്‍ സംഘം മടങ്ങുമ്പോള്‍ മനസില്‍ ഒരു വിഷമം. പിന്നെ അടുത്ത സംഘത്തിന്‍റെ താളമേളങ്ങള്‍ക്കായി കാതോര്‍ക്കുകയായി.

കരോള്‍ സംഘത്തിന്‍റെ കാര്യം പറയുമ്പോള്‍ ജോയിയെക്കുറിച്ച്‌ പറയാതിരിക്കാനാവില്ല. ഞങ്ങളുടെ നാട്ടിലെ തൊഴില്‍ രഹിതരായ ചെറുപ്പക്കാരില്‍ ഒരാളാണ്‌ ജോയി. തൊഴില്‍ ഇല്ലെന്നു കരുതി ഉപജീവനത്തിനുള്ള വക ഇല്ലാതില്ല. അറിയപ്പെടുന്ന കലാകാരനല്ലെങ്കിലും കക്ഷിയുടെ മനസില്‍ ഒരു കലാകാരനുണ്ടായിരുന്നു. അതുകൊണ്ടുതന്നെയാണ്‌ എല്ലാ വര്‍ഷവും ക്രിസ്മസ്‌ വേളയില്‍ ജോയി മുന്‍കൈ എടുത്ത്‌ ഒരു കരോള്‍ സംഘം ഉണ്ടാക്കുന്നത്‌.

കുറെ ദിവസം പാട്ടും കൂത്തുമൊക്കെയായി ആഘോഷിക്കാം, മാത്രമല്ല ക്രിസ്മസ്‌ കരോള്‍ എന്നാല്‍ ആത്മീയതയുടെ പരിവേഷവുമുണ്ടല്ലോ?. ജോയിയുടെ കരോള്‍ സംഘത്തെ മുന്‍പ്‌ പറഞ്ഞ തട്ടിക്കൂട്ട്‌ വിഭാഗത്തില്‍ പെടുത്താവുന്നതാണ്‌. അന്ന്‌ ക്രിസ്മസ്‌ രാത്രിയായിരുന്നു. അവരുടെ കരോള്‍ പര്യടനം ഇരുപത്തിയഞ്ചോളം വീടുകള്‍ പിന്നിട്ടു. അടുത്ത വീട്ടില്‍ എത്താന്‍ നടപ്പാതയില്‍നിന്നും കല്‍പടവുകള്‍ കയറി അല്‍പ്പ ദൂരം നടക്കണം.

"നിങ്ങള്‍ പോയിട്ടു വാ.. ഞാന്‍ ഇവിടെ നില്‍ക്കാം" ജോയി പറഞ്ഞു.

അല്‍പ്പം വിശ്രമിക്കാന്നായിരുന്നു ജോയിയുടെ തീരുമാനം. സംഘാംഗങ്ങള്‍ അടുത്ത വീട്ടിലേക്ക്‌ പോയി. പെട്രോമാക്സ്‌ അകന്നപ്പോള്‍ ജോയി നിന്നിരുന്ന സ്ഥലത്ത്‌ നേരിയ നിലാവെളിച്ചം മാത്രം അവശേഷിച്ചു.

പോക്കറ്റില്‍നിന്ന്‌ ഒരു ബീഡി എടുത്ത തീകൊളത്തിയശേഷം ഒന്ന്‌ ഇരിക്കാന്‍ പറ്റിയ സ്ഥലത്തിനായി കക്ഷി ചുറ്റുപാടും നോക്കി. അല്‍പ്പം അകലെ ഇടവഴിയുടെ അരികില്‍തന്നെ വലിയൊരു പാറ. ബീഡിയില്‍നിന്ന്‌ ആദ്യ പുക എടുത്തുകൊണ്ട്‌ അവിടേക്ക്‌ നടന്നു. മുണ്ട്‌ പൊക്കി ഒതുക്കി വലതു കൈ പാറയില്‍ കുത്തി പുറകിലേക്ക്‌ നീങ്ങി ഇരുന്നു.

"എന്‍റമ്മോ.................... ''
ജോയിയുടെ അലര്‍ച്ചയില്‍ പരിസര പ്രദേശം നടുങ്ങി. രാഘവനും ഭാര്യയും മക്കളും ഞെട്ടി ഉണര്‍ന്നു. എന്താണ്‌ സംഭവിച്ചതെന്ന്‌ അറിയാതെ സ്തബ്ധരായിരുന്ന അവര്‍ അടുക്കളയില്‍നിന്ന്‌ ഒരു ഞരക്കം കേട്ട്‌ അവിടേക്ക്‌ പാഞ്ഞു
"എന്‍റമ്മേ................. "
അടുപ്പിനു മുകളില്‍ അവശനിലയില്‍ കിടക്കുന്ന ജോയി. സമീപത്ത്‌ മണ്‍പാത്രങ്ങളും കുപ്പി ഗ്ളാസുകളും പൊട്ടിത്തകര്‍ന്ന്‌ കിടക്കുന്നു. തലേന്ന്‌ ബാക്കിവന്ന ചോറും കറിയും അടുക്കളയിലെമ്പാടും ചിതറിയിരിക്കുന്നു.ജോയിയുടെ മുഖത്തും ദേഹത്തും ചാരം. മണ്‍പാത്രത്തിന്‍റെയും ഗ്ളാസുകളുടെയും ചീളുകള്‍ കൊണ്ട്‌ കയ്യും പുറവും മുറിഞ്ഞിരിക്കുന്നു.
"ഇതെന്നാ എടപാടാ ജോയിക്കുഞ്ഞേ"
അടുപ്പിനു മുകളില്‍നിന്ന്‌ ജോയിയെ പിടിച്ചെഴുന്നേല്‍പ്പിക്കുന്നതിനിടെ രാഘവന്‍ ചോദിച്ചു.
"കരോളിന്‌ വന്നതാ... "

''എന്‍റെ കൂര പൊളിച്ചിട്ടാണോ കരോള്‌. കള്ളക്കടം മേടിച്ച്‌ കുത്തിക്കൂട്ടിയതാ എനി ഞാന്‍ എന്നാ ചെയ്യും?"

"പാറയാണെന്നു കരുതി ഇരുന്നതാ ചേട്ടാ.. മേല്‍ക്കൂരയാണെന്ന്‌ അറിഞ്ഞില്ല"

അര്‍ധ നഗ്നനായ ജോയിയോട്‌ അടുത്ത ചോദ്യം ഉന്നയിക്കുന്നതിനു മുമ്പേ രാഘവന്‍ കണ്ടു- മുകളില്‍ കഴുക്കോലില്‍ ഉടക്കി കിടക്കുന്ന വെള്ള മുണ്ട്‌. മുണ്ട്‌ എടുത്ത്‌ ജോയിക്ക്‌ കൈമാറുന്നതിനിടെ രാഘവന്‍ ഭാര്യയോടു കയര്‍ത്തു.

"നീ ഒറ്റയൊരുത്തിയാ ഇതിനൊക്കെ കാരണം. ഓല മേഞ്ഞാ മതീന്ന്‌ പല വട്ടം ഞാമ്പറഞ്ഞതാ. മോഡേണ്‍ റൂഫ്‌ ഇടാന്‍ നിനക്കല്ലാരുന്നോ നിര്‍ബന്ധം. കൂഴിലിരിക്കുന്ന വീടിന്‌ മോഡേണ്‍ റൂഫ്‌ ഇട്ടതിന്‍റെ ഇപ്പം അനുഭവിച്ചില്ലേ?"


----------------------------
മോഡേണ്‍ റൂഫ്
കടലാസും ടാറും മറ്റും ചേര്‍ത്തുണ്ടാക്കുന്ന ഒരു മേച്ചില്‍ വസ്തു. പാവങ്ങളുടെ ആസ്ബറ്റോസ് ഷീറ്റ് എന്ന് അറിയപ്പെട്ടിരുന്നു.
കടയില്‍നിന്ന് വാങ്ങുന്പോള്‍ വെള്ളിനിറം. മേച്ചില്‍ കഴിഞ്ഞ് കുറെ വെയിലും മഴയും കൊണ്ടു കഴിയുന്പോള്‍ കറുത്ത നിറം.

Tuesday, August 21, 2007

എം.ടിയുടെ ഓണക്കുറിപ്പ്

ഓണത്തിന്‌ വേറിട്ടൊരു പോസ്റ്റിടണം. അതിനുള്ള ആലോചനക്കിടെയാണ്‌ എനിക്ക്‌ ഏറെ അടുപ്പമുള്ള എം.ടിയെക്കുറിച്ച്‌ ഓര്‍ത്തത്‌. ഉടന്‍തന്നെ അദ്ദേഹത്തെ വിളിച്ച് കാര്യം പറഞ്ഞു- എന്‍റെ ബ്ളോഗിലേക്ക്‌ ഒരു ഓണക്കുറിപ്പ്‌ വേണം.
ബ്ളോഗുകളെക്കുറിച്ച്‌ കേട്ടിട്ടുണ്ടെങ്കിലും അദ്ദേഹത്തിന്‌ കാര്യമായ പിടിയില്ല. ബൂലോകത്തെക്കുറിച്ച്‌ വളരെ വിശമായിത്തന്നെ ഒരു ഈ-മെയില്‍ നാട്ടിലുള്ള ഒരു സുഹൃത്ത്‌ പ്രമോദിന്‌ അയച്ചുകൊടത്തു. അത്‌ എം.ടിക്ക്‌ എത്തിക്കാനും എനിക്കായി അദ്ദേഹം തയാറാക്കുന്ന കുറിപ്പ്‌ അയച്ചുതരാനും അവനെ ചുമതലപ്പെടുത്തി.
രണ്ടു ദിവസത്തെ കാത്തിരിപ്പേ വേണ്ടിവന്നുള്ളൂ. കുറിപ്പ്‌ ഇന്നലെ എത്തി. അത്‌ താഴെ നിക്ഷേപിക്കുന്നു.

പ്രിയപ്പെട്ടവരെ,
കണ്ണാന്തളിപ്പൂക്കളുടെ ഉദ്യാനം. അതാണ്‌ ഓണത്തെക്കുറിച്ച്‌ ഓര്‍ക്കുമ്പോള്‍ ഇന്നും മനസില്‍ വിരിയുന്ന ചിത്രം. തുമ്പയും തുളസിയും മുക്കുറ്റിയും ചൂടി നില്‍ക്കുന്ന കാടുകളും കാവുകളും കുട്ടിക്കാലം മുതലേ കണ്ടിട്ടുള്ളതാണ്‌. ഓണത്തിന്‌ എവിടെനിന്നാണ്‌ ഇത്രയും പൂക്കള്‍ പുറപ്പെട്ടു പോരുന്നത്‌ എന്ന്‌ ഞാന്‍ വിസ്മയിച്ചിട്ടുണ്ട്‌. മഴ നനഞ്ഞ ഞാറ്റടികളില്‍നിന്ന്‌ ഓണവെയില്‍ തട്ടി പുതുതായി പിറക്കുന്നതായിരിക്കുമോ ഈ പുക്കള്‍?

മുതിര്‍ന്നപ്പോള്‍ വേനലില്‍ തണ്ണിമത്തനുകള്‍ പരന്നുകിടക്കുന്ന പാടങ്ങള്‍ കാണുമ്പോഴും ഇതേ സംശയം എന്നിലുണര്‍ന്നിട്ടുണ്ട്‌. വേനല്‍ക്കാലത്ത്‌ ഇത്രയേറെ വെള്ളം സംഭരിച്ചുവെച്ച ഒരു ഫലം?. പ്രകൃതിയില്‍ ഇത്തരത്തില്‍ ഒട്ടേറെ വിസ്മയങ്ങളുണ്ട്‌. കൈതച്ചക്കക്കരുകില്‍ കള്ളനെ കൊത്താന്‍ പാമ്പുകള്‍ മാളംകെട്ടി താമസിക്കാറുണ്ട്‌ എന്ന്‌ പറയുന്നതുപോലെ.
ഓണം ഉള്‍പ്പെടെയുള്ള ആഘോഷങ്ങള്‍ ഋതുമാറ്റത്തെയും മനുഷ്യനെ പരിചരിക്കാനുള്ള പ്രകൃതിയുടെ സന്നദ്ധതയെയുമാണ്‌ നമ്മെ ഓര്‍മിപ്പിക്കുന്നത്‌.

കുട്ടിക്കാലത്ത്‌ നല്ലൊരു ഓണമുണ്ട ഓര്‍മയില്ല. സത്യത്തില്‍ ജന്‍മദിനം പോലും നന്നായി ആഘോഷിക്കാന്‍ ദാരിദ്ര്യം അനുവദിച്ചിരുന്നില്ല. എങ്കിലും ഓണക്കാലത്ത്‌ അയല്‍ വീടുകളില്‍നിന്നും പായസവും മറ്റും ദാനംപോലെ കിട്ടിയിരുന്നു.
എനിക്ക്‌ എന്‍റെ ഓണം തന്നെയാണ്‌ വലുത്‌. നോവലില്‍ പറഞ്ഞിട്ടുള്ളതുപോലെ സേതുവിന്‌ സേതുവിനെ മാത്രമണല്ലോ ഇഷ്ടം?.

ദാരിദ്ര്യത്തില്‍നിന്ന്‌ കരകയറി ഇന്ന്‌ സമൃദ്ധമായ ഓണമുണ്ണാന്‍ എനിക്ക്‌ കഴിയുന്നു. എങ്കിലും കരിപുരണ്ട പാത്രങ്ങളോട്‌ തോന്നുന്ന ഗൃഹാതുരതത്വം ഉണ്ണാനില്ലാതിരുന്ന ആ പഴയ ഓണക്കാലത്തോട്‌ എനിക്ക്‌ ഇന്നുമുണ്ട്‌.

നോവലില്‍ പറഞ്ഞപോലെ വരും വരാതിരിക്കില്ല എന്ന പ്രതീക്ഷ പങ്കിട്ട്‌, അനാഥരായ തെരുവു കുട്ടികള്‍ക്കൊപ്പം സമൃദ്ധിയുടെ വാഗ്ദാനം നല്‍കി ഈ ഓണക്കാലം ചെലവിടണമെന്ന്‌ ഞാന്‍ ആഗ്രഹിക്കുന്നു.

ബൂലോകത്തേക്ക്‌ എന്നെ കൂട്ടിക്കൊണ്ടുവന്ന പതാലിക്കും ഇവിടെയുള്ള എല്ലാവര്‍ക്കും എന്‍റെ ഹൃദയം നിറഞ്ഞ ഓണാശംസകള്‍.

സസ്നേഹം

എം. ടി


കുറിപ്പ്‌
എം.ടി = മുരളി തെക്കേത്തറ. ഞങ്ങളുടെ ഗ്രാമത്തിലെ അറിയപ്പെടുന്ന സാമൂഹ്യ, സാംസ്കാരിക പ്രവര്‍ത്തകന്‍. ഈ രണ്ട്‌ അക്ഷരങ്ങള്‍ കേട്ടാല്‍ നാട്ടിലെ ഏതു കൊച്ചു കുട്ടിയുടെയും മനസില്‍ തെളിയുന്ന ശുഭ്രവസ്ത്രധാരി. എം.ടി. വാദുദേവന്‍ നയാരുടെയും ഒ.വി വിജയന്‍റെയും ഭാഷയില്‍ സംസാരിക്കാനും എഴുതാനും മുരളിയേട്ടനുള്ള വൈദഗ്ധ്യം എടുത്തു പറയേണ്ടതാണ്‌. അദ്ദേഹത്തെപ്പോലൊരാളെ പരിചയപ്പെടുത്തുന്നതാകട്ടെ ബൂലോകര്‍ക്കുള്ള എന്‍റെ ഓണസമ്മാനം

Tuesday, April 17, 2007

മദ്യപാനവും പുകവലിയും പിന്നെ ചുള്ളിക്കാടും

ബാചന്ദ്രന്‍ ചുള്ളിക്കാടിന്‍റെ (എന്നു കരുതുന്ന സൂര്യകാന്തി ബ്ലോഗില്‍)മദ്യപാനവും പുകവലിയും എന്ന പോസ്റ്റ് പലരും ശ്രദ്ധിച്ചിരിക്കും. കമന്‍റുകള്‍ക്ക് അരിപ്പ വെച്ചിട്ടുള്ളതിനാല്‍ പുകഴ്ത്തലും അഭിനന്ദനവും അനുഭാവവും ഉള്‍പ്പെടുന്ന പ്രതികരണങ്ങള്‍ മാത്രമാണ് അതിനൊപ്പം പ്രത്യക്ഷപ്പെട്ടത്.

അരിപ്പ വെക്കുന്നത് ഓരോരുത്തരുടെ സൗകര്യത്തിന്‍റെയും സ്വാതന്ത്ര്യത്തിന്‍റെയും ഭാഗം. അരിപ്പയില്‍ കുടുങ്ങി പുറത്തുപോയ കമന്‍റെല്ലാം പോസ്റ്റാക്കുന്നത് മര്യാദയല്ലെന്നും അറിയാം. പക്ഷെ ഒരു കാലഘട്ടത്തിന്‍റെ ആവേശവും ക്ഷുഭിത യൗവ്വനവുമൊക്കെയായി നിറഞ്ഞു നില്‍ക്കുകയും ഡോ. സുകുമാര്‍ അഴീക്കോടിനെപ്പോലെ പലരെയും വിമര്‍ശനത്തിന്‍റെ ശരശയ്യയില്‍ കിടത്തുകയും ചെയ്ത ചുള്ളിക്കാട് സ്വന്തം രചനകളോടുള്ള പ്രതികരണങ്ങളി‍ല്‍ അസഹിഷ്ണുവാകുന്നത് കാണുന്പോള്‍ എന്തോ ഒരു പന്തികേട്.
അതുകൊണ്ടുതന്നെ സൂര്യകാന്തിയുടെ ഉടമസ്ഥന്‍ ചുള്ളിക്കാടാണെന്ന് വിശ്വസിക്കാന്‍ ഇപ്പോഴും ഒരു മടി.

ഇന്നലെ വെറുതേ ഒന്നു പരതിയപ്പോള്‍ സൂര്യകാന്തി അപ്രത്യക്ഷമായിരിക്കുന്നു. എനിക്ക് കിട്ടാത്തതാണോ അതോ സംഗതി മുങ്ങിയതാണോ എന്ന് അറിയില്ല.

ഏതായാലായും ചുള്ളിക്കാടിന്‍റെ മറ്റൊരു പോസ്റ്റിന്‍റെ കാര്യത്തില്‍ അന്പി ചെയ്തതുപോലെ നേരത്തെ ഞാനിട്ട കമന്‍റില്‍നിന്നുള്ള ചില ഭാഗങ്ങള്‍ ഇവിടെ ചേര്‍ക്കുകയാണ്. ബൂലോകത്തെ നടപ്പു മര്യാദകള്‍ക്ക് വിരുദ്ധമാണെങ്കില്‍ ക്ഷമിക്കുക.

മദ്യപാനവും പുകവലിയും നിര്‍ത്തിയത് ചുള്ളിക്കാടിനും അദ്ദേഹത്തിന്‍റെ കുടുംബത്തിനും വളരെ ഗുണകരമായ കാര്യമാണ്. മദ്യത്തിനും മയക്കുമരുന്നിനും അടിമകളായവര്‍ക്ക്‌ ഇത്തരം ദുശീലങ്ങളില്‍നിന്ന് മോചനം നേടുന്നത് ഏറ്റവും വലിയ ജീവിത വിജയമായി തോന്നുന്നത് സ്വാഭാവികം.

അദ്ദേഹത്തെപ്പോലെ ഒരാളുടെ അനുഭവം കവിയും ചലച്ചിത്ര നടനും ഇപ്പോള്‍ സീരിയല്‍ നടനുമെന്ന നിലയില്‍ അദ്ദേഹത്തെ മാനിക്കുന്ന ചിലര്‍ക്കെങ്കിലും പ്രചോദനമായേക്കാം.

കുടിക്കുകയോ വലിക്കുകയോ ഇതൊക്കെ നിര്‍ത്തുകയോ ചെയ്യുന്നത് അദ്ദേഹത്തിന്‍റെ ഇഷ്ടം. പക്ഷെ സ്വയം മാന്യനായെന്ന പ്രഖ്യാപനത്തിനൊപ്പം തനിക്കൊപ്പം കള്ളുകുടിച്ചിരുന്ന പ്രമുഖരുടെ നീണ്ട പട്ടിക പുറത്തുവിട്ട്‌ അവരുടെയൊക്കെ മുഖത്ത്‌ ചെളി വാരിയ എറിയുമ്പോള്‍ ചുള്ളിക്കാടിനെ ബഹുമാനിക്കുന്ന വായനക്കാര്‍ പുനര്‍വിചിന്തനത്തിന്‌ നിര്‍ബന്ധിതരായേക്കും.
പൊങ്ങച്ചം എന്ന വിശേഷത്തോടെ ചുള്ളിക്കാട് അവതരിപ്പിച്ചിരിക്കുന്ന പട്ടികയിലുള്ള മഹാശ്വേതാ ദേവിയും പണ്ഡിറ്റ്‌ ഭീംസെന്‍ ജോഷിയും ശ്രീവിദ്യയും മമ്മൂട്ടിയുമൊക്കെ കള്ളു കുടിക്കാന്‍ കൂട്ടില്ലെന്ന്‌ പത്രത്തില്‍ പരസ്യം നല്‍കിയതു പ്രകാരമല്ല അദ്ദേഹം അവര്‍ക്ക്‌ കമ്പനി കൊടുത്തതെന്ന്‌ കരുതട്ടെ.

മറിച്ച്‌ ബാലചന്ദ്രന്‍ എന്ന വ്യക്തിയെ അവര്‍ മാനിക്കുകയും വിശ്വസിക്കുകയും ചെയ്തിരുന്നതുകൊണ്ടാണ്‌. അതായത്‌ ഒരു പരസ്പര ധാരണയുടെ പേരിലും വ്യത്യസ്ത സാഹചര്യങ്ങളിലുമായിരുന്നു ഈ കള്ളുകുടികളെന്ന്‌ സാരം. ഒരു സുപ്രഭാതത്തില്‍ ചുള്ളിക്കാട് മാന്യനായ ശേഷം 'ഗ്ളാസ്മേറ്റുകളുടെ' പേര്‌ വിളിച്ചു കൂവുമെന്ന്‌ അറിഞ്ഞിരുന്നെങ്കില്‍ അവര്‍ ഒരിക്കലും ഇത്തരം ഒരു സാഹസത്തിന്‌ മുതിരുമായിരുന്നെന്ന് എനിക്ക് തോന്നുന്നില്ല.

അദ്ദേഹം പറയുന്ന പട്ടികയില്‍ മദ്യപാന ശീലമുള്ളവരെന്ന്‌ അറിയപ്പെടുന്നവരുമുണ്ട്‌ അല്ലാത്തവരുമുണ്ട്‌. പക്ഷെ ഇവരില്‍ ചിലരുടെയെങ്കിലും കുടുംബാംഗങ്ങളെയും ആരാധകരെയുമൊക്കെ അവര്‍ മദ്യപിക്കുന്നവരായിരുന്നു എന്ന വിവരം ആദ്യമായി അറിയിക്കുക എന്ന വലിയ ദൌത്യമാണ് ഈ പോസ്റ്റ് നിര്‍വഹിച്ചിരിക്കുന്നത്.

മദ്യപാനികളില്‍ ഒരു ന്യൂനപക്ഷം മാത്രമാണ്‌ ഇലക്ട്രിക്‌ പോസ്റ്റിനെ ആലിംഗനം ചെയ്യുകയും ഓടയില്‍ ഉറങ്ങുകയും ചെയ്യുന്നത്‌. ഭൂരിപക്ഷം ഇതൊക്കെ രഹസ്യമായി നടക്കണമെന്ന്‌ ആഗ്രഹിക്കുന്നവരാണ്‌. വര്‍ഷങ്ങളോളം കള്ളുകുടിച്ചതിന്‍റെ പുരാണം പറയുന്ന കവിക്ക്‌ മദ്യപാനവുമായി ബന്ധപ്പെട്ട പരസ്പര ധാരണയെക്കുറിച്ച്‌ ബോധ്യമില്ലെന്നും വിശ്വസിക്കാനാവുന്നില്ല.

കത്തോലിക്കാ സഭയിലെ കരിസ്മാറ്റിക്‌ പ്രസ്ഥാനത്തെക്കുറിച്ച്‌ അദ്ദേഹം കേട്ടിട്ടുണ്ടാവും. കരിസ്മാറ്റിക്‌ കേന്ദ്രങ്ങളില്‍ രോഗശാന്തിക്കും ദുശീലങ്ങളില്‍നിന്നുള്ള മോചനത്തിനുമായുള്ള പ്രാര്‍ത്ഥനകളും പതിവാണ്‌. മുരിങ്ങൂരിലെ ഡിവൈന്‍ റിട്രീറ്റ്‌ സെന്‍റര്‍ സജീവമായി തുടങ്ങിയ കാലം മുതല്‍ മദ്യാപാനത്തിനും മയക്കുമരുന്നിനും അടിമകളായവരെ അവിടെ പ്രാര്‍ത്ഥനക്ക്‌ എത്തിക്കാറുണ്ട്‌. ഭൂരിഭാഗം പേരെയും ബന്ധുക്കള്‍ സമ്മര്‍ദ്ദം ചെലുത്തിയും ബലം പ്രയോഗിച്ചുമാണ്‌ കൊണ്ടുപോകുന്നത്‌.

ഒരാഴ്ച്ചത്തെ ധ്യാനം കഴിഞ്ഞാല്‍ പരിശുദ്ധാത്മാവിനെ പ്രാപിച്ചവരായി പുറത്തിറങ്ങുന്ന ഇക്കൂട്ടര്‍ നാട്ടിലെത്തി പഴയ കള്ളുകുടി കമ്പനിക്കാരെ ഉപദേശിച്ച്‌ നേരെയാക്കാന്‍ ശ്രമിക്കും(ചിന്താവിഷ്ടയായ ശ്യാമള എന്ന ചിത്രത്തിലെ ശ്രീനിവാസനെപ്പോലെ).

ഒരു ആത്മാവ്‌ രക്ഷപ്പെട്ടല്ലോ എന്ന്‌ ആശ്വസിച്ചിരിക്കുന്ന നാട്ടുകാരെ ഞെട്ടിച്ചുകൊണ്ട്‌ ഇത്തരക്കാര്‍ വൈകാതെ പണ്ടത്തേതിന്‍റെ പിന്നത്തേതാകും. ചുള്ളിക്കാടിന്‍റെ പോസ്റ്റിന്‍റെ ആദ്യ ഭാഗം വായിച്ചപ്പോള്‍ നിശ്ചയ ദാര്‍ഢ്യമാണ്‌ കാണാന്‍ കഴിഞ്ഞത്‌. പക്ഷെ അവസാനത്തെ 'ആ നോക്കാം' എന്ന പ്രയോഗത്തില്‍ ആ നിശ്ചയദാര്‍ഢ്യം ചോര്‍ന്നു പോയി.

ഏതായാലും തീരുമാനത്തിന്‍റെ പാതയില്‍ ഉറച്ചു നില്‍ക്കാനും ഭാവിയിലും ഇത്തരം പൊങ്ങച്ചങ്ങള്‍ സൃഷ്ടിക്കാനും ചുള്ളിക്കാടിന് കഴിയട്ടെ എന്ന്‌ പ്രാര്‍ത്ഥിക്കുന്നു.

ഒപ്പം ഈ ലിസ്റ്റില്‍ പരാമര്‍ശിച്ചിരിക്കുന്ന ആരും കടുംകൈ കാണിക്കാതിരിക്കട്ടെ എന്നും ആരുടെയും കുടുംബം കലങ്കാതിരിക്കട്ടെ എന്നും.

Sunday, March 18, 2007

പാക്കിസ്ഥാന്‍ കോച്ച് ദൂരൂഹ സാഹചര്യത്തില്‍ മരിച്ചു



കളിയെ കളിയായി കാണാന്‍ ഇന്ത്യക്കാര്‍ മറക്കുന്നോ?
ലോകകപ്പുമായി ബന്ധപ്പെട്ടുള്ള ഇന്നത്തെ പോസ്റ്റില്‍
ബാലു ഉന്നയിച്ച ചോദ്യം ഇതായിരുന്നു.
ഇന്നലത്തെ തോല്‍വിയുടെ പേരില്‍ ഇന്ത്യന്‍ താരങ്ങളുട
നേരെ ഉയരുന്ന പ്രതിഷേധത്തെക്കുറിച്ചാണ് ബാലു പരാമര്‍ശിച്ചത്.

ഇന്ത്യക്കാരെന്നല്ല, ആരും കളിയെ കളിയായി കാണാന്‍ തയാറാകുന്നില്ല എന്നതാണ്
സത്യം. ഈ സാഹചര്യത്തിന്‍റെ ഇരയാണ് പാക്കിസ്ഥാന്‍ ക്രിക്കറ്റ് ടീം പരിശീലകന്‍
ബോവ് വൂമര്‍.ഇത് ഏഴുതുന്പോഴും വൂമറുടെ മരണകാരണം ദുരൂഹമാണ്.
ആത്മഹത്യയാണെന്നും ഹൃദയാഘാതമാണെന്നും സൂചനകളുണ്ട്.

എന്തായാലും ഒരു കാര്യം വ്യക്തമാണ്. ലോകകപ്പില്‍ ആദ്യം പുറത്തായ ടീമിന്‍റെ
പരിശീലകന്‍ എന്ന നിലയിലുള്ള അപമാനവും തന്‍റെ രക്തത്തിനുവേണ്ടി ഉയരാനിടയുള്ള
മുറവിളിയെക്കുറിച്ചുള്ള ഭീതിയുമാണ്(ഞെട്ടിപ്പിക്കുന്ന മറ്റെന്തെങ്കിലും വിവരം പുറത്തു വന്നില്ലെങ്കില്‍) ഈ ഇംഗ്ലീഷുകാരന്‍റെ മരണത്തില്‍ കലാശിച്ചത്.

തോല്‍വിയും വിജയവും കായിക ലോകത്ത് സര്‍വസാധാരണമാണ്. തോല്‍വിയുടെ പേരില്‍
ഒരു ജീവന്‍ വില നല്‍കേണ്ടിവരുന്നത് അതി ദാരുണവും

ക്രിക്കറ്റ് ലോകത്തിനൊപ്പം വൂമറുടെ വേര്‍പാടിലുള്ള വേദനയില്‍ പങ്കു ചേരുന്നു.

Saturday, March 10, 2007

ധര്‍മസങ്കടം






ധര്‍മസങ്കടം1

മോഹനേട്ടന്‍റേത്

ഋഷികേശ്‌ മൃത്യുഞ്ജയനെ നേരിട്ട്‌ അറിയിയില്ലെങ്കിലും അദ്ദേഹത്തെക്കുറിച്ച്‌ നിങ്ങളില്‍ പലരും കേട്ടിരിക്കും. ഞാന്‍ പറയുന്ന രണ്ടാമത്തെ സംഭവത്തിന് ഋഷികേശിന്‍റ അനുഭവവുമായി ബന്ധമുള്ളതുകൊണ്ട്‌ അത്‌ ഒരിക്കല്‍കൂടി
ആവര്‍ത്തിക്കുകയാണ്‌.
എറണാകുളം ജനറല്‍ ആശുപത്രിയാണ്‌ രംഗം. പതിവുപോലെ ആ തിങ്കളാഴ്ച്ചയും ഔട്ട്‌ പേഷ്യന്‍റ് വിഭാഗത്തില്‍ വന്‍ തിരക്കയിരുന്നു.
രോഗികള്‍ക്ക്‌ ചീട്ട്‌ എഴുതിക്കൊടുക്കുന്ന ജോലി സാധാരണയായി ഏതെങ്കിലും അറ്റന്‍ഡര്‍മാരോ നഴ്സിംഗ്‌ അസിസ്റ്റന്‍റുമാരോ ആണ്‌ ചെയ്യുന്നത്‌. അന്ന്‌
ചീട്ടെഴുതാന്‍ ഇരുന്നത്‌ റിട്ടയര്‍മെന്‍റിന്‍റെ പടിവാതില്‍ക്കല്‍ എത്തിയ മോഹനേട്ടനാണ്‌.
പത്രങ്ങളും മാസികകളും പുസ്തകങ്ങളുമൊക്കെ മുടങ്ങാതെ
വായിക്കുമെങ്കിലും എഴുത്തിന്‍റെ കാര്യത്തില്‍ മോഹനേട്ടന്‍ അത്ര പോര. പിന്നെ അത്യാവശ്യത്തിന്‌ ചില്ലറ എഴുത്തുകുത്തുകള്‍ നടത്തുമെന്നു മാത്രം.
ആ ചില്ലറയുടെ ബലത്തിലാണ്‌ ചീട്ടെഴുതാനും ഇരിക്കുന്നത്‌.
പണ്ടൊക്കെ ചീട്ടെഴുത്ത്‌ വലിയ ബുദ്ധിമുട്ടില്ലാത്ത ജോലിയായിരുന്നെന്നും ഇപ്പോഴത്തെ ഭൂരിഭാഗം പിള്ളേര്‍ക്കും 'കൊനഷ്ട്‌' പേരുകളായതുകൊണ്ട്‌
വെള്ളംകുടിച്ചുപോകുമെന്നും മോഹനേട്ടന്‍ ഇടക്കിടെ പറയാറുണ്ട്‌. എന്തായാലും മൂന്നു മാസംകൂടി തള്ളിനീക്കിയാല്‍ മതിയല്ലോ എന്ന
ആശ്വാസത്തിലായിരുന്നു അദ്ദേഹം.
തിങ്ങളാഴ്ച്ചത്തെ സംഭവത്തിലേക്ക്‌ മടങ്ങിവരാം.
ക്യൂവില്‍ നില്‍ക്കുന്നവര്‍ ഒന്നൊന്നായി കൌണ്ടറിനു മുന്നിലെത്തി
പേരുവിവരം പറഞ്ഞു.
"സുധ രാജന്‍, 32 വയസ്‌"
"കാത്തു ഗോപാലന്‍, 65"
"ബേബി മാത്യു, 45"
"ആരതി വേണുഗോപാല്‍, 9"
മോഹേനേട്ടന്‍ ചീട്ടുകള്‍ ഒന്നൊന്നായി എഴുതിക്കൊണ്ടിരുന്നു.
ക്യൂവില്‍ ഏറെ ആളുകള്‍ ബാക്കിയാണ്‌.
"പൂക്കോയ തങ്ങള്‍, 74 "
"ഋഷികേശ്‌ മൃത്യുഞ്ജയന്‍.............. 32"
മോഹനേട്ടന്‍ ഒരു ഞെട്ടലോടെ തല ഉയര്‍ത്തി.
താടി വളര്‍ത്തിയ ഒരു പുരുഷ രൂപം മുന്നില്‍ നില്‍ക്കുന്നു.
മൊത്തത്തില്‍ ഒരു ഉത്തരാധുനിക ലേ ഔട്ട്‌.
"നോക്കി നില്‍ക്കാതെ പേരു പറയ്‌.... "
മോഹനേട്ടന്‍ തിടുക്കത്തില്‍ പറഞ്ഞു.
"പേരാണ്‌ പറഞ്ഞത്‌. ഋഷികേശ്‌ മൃത്യുഞ്ജയന്‍.... "
"ങ്ഹേ.... ?"
"ഋഷികേശ്‌ മൃത്യുഞ്ജയന്‍"
മോഹനേട്ടന്‍ വീണ്ടും നടുങ്ങി...
ഈശ്വരാ ഇതെന്തൊരു പരീക്ഷണം?
മലയാളം അക്ഷരമാല പഠിച്ച കാലത്തിനുശേഷം അത്യപൂര്‍വമായി
ഉപയോഗിച്ചിട്ടുള്ള അക്ഷരമായണ്‌ ഋ. അതുകൊണ്ടുതന്നെ ആ അക്ഷരം
മറ്റു പലരെയുംപോലെ മോഹേനേട്ടനും അത്ര പരിചിതമല്ല. അധികം
ചിന്തിക്കാതെ മോഹനേട്ടന്‍ ചീട്ടില്‍ എഴുതി.
റു...ശി...കാഷ്‌..............
ഇത്രയുമായപ്പോഴാണ്‌ പേരിലെ അടുത്ത കഷണം വലിയൊരു കടമ്പയായി
മോഹനേട്ടനു മുന്നില്‍ പ്രത്യക്ഷപ്പെട്ടത്‌.
മുറു......
ചില നാടകക്കാര്‍ പറയുന്നതുപോലെ മോഹനേട്ടന്‍ മനസില്‍ പറഞ്ഞു.
"ഇല്ല...എനിക്ക്‌ അതിനാവില്ല.... "
മാത്യു എന്ന പേര്‌ പരിചിതമാണ്‌. വീരമൃത്യു, മൃതദേഹം തുടങ്ങിയ വാക്കുകള്‍ പത്രങ്ങളില്‍ കാണാറുണ്ട്‌. അതൊക്കെ എഴുതുന്നത്‌ എങ്ങനെയന്ന്‌ ശ്രദ്ധിച്ചിരുന്നില്ല. ഇപ്പോള്‍ ഇതാ മൃത്യുവിനേക്കാള്‍ വലിയൊരു വാക്ക്‌ തന്നെ
വെല്ലുവിളിക്കുന്നു.
സെക്കന്‍റുകള്‍ മുന്നോട്ടു നീങ്ങി. മോഹനേട്ടന്‍ ചീട്ടില്‍ പേനവെച്ച്‌ ആലോചന തുടര്‍ന്നു. ഋഷികേശും ക്യൂവില്‍ അയാള്‍ക്കു പിന്നില്‍ നില്‍ക്കുന്നവരും അസ്വസ്ഥരായിത്തുടങ്ങി.
"ങ്ഹാ വരുന്നു...... "
ആരോ വിളിച്ചിട്ട്‌ എന്ന വ്യാജേന മോഹനേട്ടന്‍ സ്റ്റോര്‍ റൂമിലേക്ക്‌ പാഞ്ഞു. മുഖത്തെയും കഴുത്തിലെയും വിയര്‍പ്പു കണങ്ങള്‍ തുടച്ചുകൊണ്ട്‌ ഈ പ്രതിസസന്ധി എങ്ങനെ പരിഹരിക്കണമെന്ന്‌ ആലോചിച്ചു. പെട്ടെന്നു തന്നെ സുസ്മേരവദനനായി കൗണ്ടറിലേക്ക്‌ മടങ്ങിയെത്തി. ഉത്തരാധുനികന്‍ അപ്പോഴും കൗണ്ടറിനു മുന്നിലുണ്ട്‌.
രണ്ടും കല്‍പ്പിച്ച്‌ മോഹനേട്ടന്‍ ചീട്ടെഴുതി..
തെല്ല്‌ അമര്‍ഷത്തോടെ ഒരു തുണ്ടുകടലാസ്‌ ഋഷികേശിനു കൊടുത്തു.
"ഡോക്ടറുടെ മുറീടെ പുറത്ത്‌ വെയ്റ്റ്‌ ചെയ്യ്‌.
ബാബൂ......ന്ന്‌ പേരു വിളിക്കും.
അപ്പോ കേറി ചെന്നാല്‍ മതി".
ഋഷികേശിന്‍റെ കണ്ണുതള്ളി. ക്യൂവില്‍ കൂട്ടച്ചിരി പടര്‍ന്നു.
"ഇവനെയൊന്നും പറഞ്ഞിട്ട്‌ കാര്യമില്ല. പേരിട്ട തന്തയെയും തള്ളയെയും
തെരണ്ടിവാലു കൊണ്ട്‌ തല്ലണം... "
പതിഞ്ഞ ശബ്ദത്തില്‍ മോഹനേട്ടന്‍ പറഞ്ഞുപൂര്‍ത്തിയാക്കും മുമ്പ്‌
ഋഷികേശിന്‍റെ പിന്നില്‍ നിന്നിരുന്ന സ്ത്രീ പേരു പറഞ്ഞു.
"സുജ ഡേവിഡ്‌ 29.
***************************
(മോഹനേട്ടന്‍റെ കഥ പല നാടുകളില്‍ പല രീതിയില്‍ പ്രചരിക്കുന്നുണ്ട്‌.
വേദികളും കഥാപാത്രങ്ങളും മാറുമ്പോള്‍ കഥയിലും ചില ചെറിയ
വ്യത്യാസങ്ങള്‍ ഉണ്ടായിട്ടുമുണ്ട്‌. ബാബൂ....ന്ന് വിളിക്കും എന്നത്
സാബൂ...ന്ന് വളിക്കും ശശീ...ന്ന് വിളിക്കും എന്നിങ്ങനെയൊക്കെ
മാറിയിരിക്കുന്നു)

ധര്‍മസങ്കടം 2

സബ് ഇന്‍സ്പെക്ടറുടേത്

പെറ്റി കേസുകളുടെ എണ്ണം തികക്കുന്നതിനായി മാസത്തില്‍ ഒരിക്കലോ രണ്ടു മാസം കൂടുമ്പോഴോ ഒരു രാത്രി ഏറണാകുളം നഗരത്തില്‍ എമ്പാടും പോലീസ്‌ അരിച്ചുപെറുക്കി പരിശോധന നടത്തുന്നത്‌ പതിവാണ്‌.
ഗതാഗത നിയമം ലംഘിച്ചവര്‍, വേശ്യകള്‍, സംശയകരമായ സാഹചര്യത്തില്‍ കണ്ടെത്തിയവര്‍ തുടങ്ങി വിവിധ വകുപ്പുകളിലായി കുറെപ്പേരെ പിടികൂടി എണ്ണം തികക്കുകയാണ്‌ കോംപിംഗ്‌ പട്രോള്‍ എന്ന ഓമനപ്പേരുള്ള പരിശോധനയുടെ ലക്ഷ്യം.
മദ്യപിച്ച്‌ വാഹനമോടിക്കുന്നവര്‍ക്കാണ്‌ പോലീസിന്‍റെ ഈ കണക്കു തികക്കല്‍ പരിപാടി പലപ്പോഴും വിനയാകാറുള്ളത്‌. ബാറുകളുടെ പരിസരത്ത്‌ കാത്തുനിന്ന്‌ ഇരകളെ പിടികൂടുന്ന പട്രോള്‍ സംഘങ്ങള്‍ ഏറെയുണ്ട്‌. എത്ര ഫിറ്റായി പുറത്തിറങ്ങുന്നവനും പോലീസിന്‍റെ കെണിയിലകപ്പെടുന്ന നിമിഷം കെട്ടിറങ്ങും. പിന്നെ മെഡിക്കല്‍ പരിശോധനയും പോലീസ്‌ സ്റ്റേഷനിലെ മൂട്ടകടിയുമൊക്കെയായി അന്നത്തെ രാത്രി സീമയുടേതുപോലെ
നിദ്രാവിഹീനമാകും.
ഇങ്ങനെ ഒരു രാത്രിയില്‍ കച്ചേരിപ്പടിക്കു സമീപം മാധവ ഫാര്‍മസി ജംഗ്ഷനില്‍ വാഹന പരിശോധന നടത്തുകയാണ്‌ ട്രാഫിക്‌ എസ്‌.ഐ രാമകൃഷ്ണനും(ഒറിജിനല്‍ പേരല്ല കേട്ടോ..) സംഘവും. വിവിധ കുറ്റങ്ങള്‍ക്ക്‌ കുടുങ്ങി ഒട്ടേറെപ്പേര്‍ പരിസരത്തുണ്ട്‌.
ഒരു ഭാഗത്ത്‌ കുറെ പോലീസുകാര്‍ വാഹനങ്ങള്‍ തടഞ്ഞു നിര്‍ത്തുന്നു.
ഇതിനിടെയാണ്‌ എം.ജി. റോഡിലൂടെ പള്‍സര്‍ ബൈക്കില്‍ ഒരു ചെറുപ്പക്കാരന്‍ പാഞ്ഞെത്തിയത്‌. പോലീസ്‌ സംഘം കൈ കാണിച്ചു. ബൈക്ക്‌ നിര്‍ത്തി. യാത്രക്കാരന്‍ ഇറങ്ങി. അയാള്‍ അടുത്തെത്തി ഹെല്‍മെറ്റ്‌ ഊരിയപ്പോള്‍തന്നെ കേസെടുക്കുന്നതിനുള്ള ഒരു വകുപ്പ്‌ എസ്‌.ഐയുടെ മൂക്കിലടിച്ചു.
"താന്‍ മദ്യപിച്ചിട്ടുണ്ട്‌ അല്ലേ.... "
"ഉണ്ട്‌ സാര്‍. ഒരു പാര്‍ട്ടി കഴിഞ്ഞ്‌ വരുന്ന വഴിയാണ്‌"
"ബാക്കി പാര്‍ട്ടി സ്റ്റേഷനില്‍ ചെന്നിട്ടാകാം വണ്ടീടെ ബുക്കും പേപ്പറും എവിടെ?"
"എല്ലാം ഉണ്ട്‌, വീട്ടിലാണ്‌.എടുക്കാന്‍ മറുന്നു പോയി. "
എസ്‌.ഐക്ക്‌ നിയന്ത്രണം വിട്ടു.
"എടുക്കാന്‍ മറന്നുപോയെങ്കില്‍ ഞാന്‍ നിന്‍റെ വീട്ടിപ്പോയി എടുത്തോണ്ടു വരാമെടാ. മൂക്കറ്റം കുടീം കഴിഞ്ഞ്‌ കടലാസില്ലാത്ത ബൈക്കുമായി എറങ്ങിരീക്കുന്നു. എന്താ നിന്‍റെ പേര്‌?"
"സ്റ്റാനിസ്ളാവോസ്‌ ഗ്രിഗോറിയോസ്‌"
""ങ്ഹേ.... ? മലയാളത്തില്‍ പറയെടോ"
"അതേ സാര്‍, എന്‍റെ പേരാണ്‌ പറഞ്ഞത്‌.
സ്റ്റാനിസ്ളാവോസ്‌ ഗ്രിഗോറിയോസ്‌. ഗ്രിഗോറിയോസ്‌ എന്നത്‌ അപ്പന്‍റെ പേരാ"
"ശരി, താന്‍ പൊയ്ക്കൊള്ളൂ"
യുവാവിന്‌ കാര്യം മനസിലായില്ല.
"എന്താ സാര്‍?"
"തന്നോട്‌ പൊക്കോളാനല്ലേ പറഞ്ഞത്‌?"
എസ്‌.ഐ ഇപ്പം വിളിക്കും എന്ന ശങ്കയോയെ സ്റ്റാനിസ്ളാവോസ്‌
സാവധാനം ബൈക്കിനു സമീപത്തേക്ക്‌ നടന്നു.
എസ്‌.ഐ വിളിച്ചില്ല.
ബൈക്കില്‍ കയറിയതും ശരം വിട്ട പോലെ യുവാവ്‌ പറപറന്നു.
എസ്‌.ഐയുടെ ഒപ്പമുണ്ടായിരുന്ന പോലീസുകാര്‍ വാപൊളിച്ച്‌ നില്‍ക്കുകയാണ്‌.
"സര്‍ എന്തു പണിയാണ്‌ ഈ കാണിച്ചത്‌. മൊത്തം വയലേഷനല്ലാരുന്നോ?. കള്ളും കുടിച്ച്‌ കടലാസില്ലാതെ വണ്ടിയോടിച്ചവനെയാ സാര്‍ വെറുതെ വിട്ടത്‌"
ഒരു പോലീസുകാരന്‍ പറഞ്ഞു.
അരിശത്തിന്‍റെ പരകോടിയില്‍ എസ്‌.ഐ പല്ലു
കടിച്ചു ഞെരിക്കുന്നത്‌ പോലീസുകാരന്‌ കേള്‍ക്കമായിരുന്നു.
സമീപത്തിരുന്ന ബൈക്കിന്‍റെ സീറ്റില്‍ വലതു കൈകൊണ്ട്‌
അഞ്ഞിടിച്ചുകൊണ്ട്‌ എസ്‌.ഐ പോലീസുകാരനോടു ചോദിച്ചു.
"ആ--- മോന്‍റെ ------ലെ പേര്‌
എഴുതിയെടുക്കാന്‍ തന്‍റെ ---- വരുമോ?"

Monday, February 12, 2007

ഒടുവില്‍ ഒരു മലയാളി ലോകകപ്പിന്

‍മാന്യമഹാ ക്രിക്കറ്റ്‌ പ്രേമികളെ...
വര്‍ഷങ്ങള്‍ നീണ്ട കാത്തിരിപ്പിനൊടുവില്‍ ഭൂമിമലയാളത്തില്‍നിന്ന്‌
ഒരു പയ്യന്‍ ലോകകപ്പ്‌ ക്രിക്കറ്റിനുള്ള ഇന്ത്യന്‍ ടീമില്‍ ഇടം നേടിയിരിക്കുന്നു.

ആദ്യംതന്നെ ശ്രാശാന്തിന്‌ അഭിനന്ദനങ്ങള്‍.

കെ.എല്‍ മോഹനവര്‍മയുടെ ക്രിക്കറ്റ്‌ എന്ന നോവല്‍ വായിച്ചപ്പോള്‍ ആവേശം കൊള്ളുകയും വായന കഴിഞ്ഞപ്പം കോട്ടുവാ ഇട്ടുകൊണ്ട്‌ ഇതൊക്കെ എപ്പം നടക്കാനാ...? എന്ന്‌ ചോദിക്കുകയും ചെയ്തവര്‍ ഏറെയാണ്‌.

ഒടുവില്‍ ടിനു യോഹന്നാനെത്തേടി ഇന്ത്യന്‍ ടീമിലേക്ക്‌ വിളി വന്നപ്പോ ഹമ്പട വര്‍മേ... എന്തൊരു ദീര്‍ഘ ദൃഷ്ടി! എന്നു പറഞ്ഞവരെ കുറ്റപ്പെടുത്താനാകുമോ?

ലോംഗ്‌ ജംപില്‍ ഏഷ്യന്‍ റെക്കോര്‍ഡ്‌ സൃഷ്ടിക്കുകയും എട്ടു മിറ്റര്‍ താണ്ടിയ ഇന്ത്യക്കാരനെന്ന ഖ്യാതി മൂന്നു പതിറ്റാണ്ടോളം സ്വന്തമാക്കിവെക്കുകയും ചെയ്ത സാക്ഷാല്‍ ടി.സി യോഹന്നാന്‍റെ മകനല്ലെ, യെവന്‍ കലക്കുമെന്ന്‌ എല്ലാവരും വിധിച്ചത്‌ സ്വാഭാവികം.

എവടെ കലക്കാന്‍? യോഹന്നാന്‍ രണ്ടാമന്‍ വന്ന പോലെ മടങ്ങി.

യോന്നാച്ചന്‍റെ മകനു പറ്റാത്തത്‌ കോതമംഗലത്തുനിന്ന്‌ കൊച്ചിയിലേക്ക്‌ കൂടുമാറിയ, കായികതാരമല്ലാത്ത ശാന്തകുമാരന്‍നായരുടെ മകന്‍ ശ്രീശാന്തിനു പറ്റുമോ എന്ന്‌ കരുതിയവരും കുറവല്ല.

പക്ഷെ, സുരാജ്‌ വെഞ്ഞാറമ്മൂട്‌ പറഞ്ഞതുപോലെ(രാജമാണിക്യത്തിന്‌ പുള്ളിയാണു കേട്ടോ ഇതു പറഞ്ഞുകൊടുത്തത്‌) യെവന്‍ പുലിക്കുട്ടിയായിരുന്നു. മനഃശാസ്ത്രവും ബ്രേക്‌ ഡാന്‍സും അങ്ങനെ പരസ്പര ബന്ധമില്ലാത്ത പല കാര്യങ്ങളിലും പ്രാവീണ്യമുള്ള ശ്രീശാന്ത്‌ വലിയ കുഴപ്പമില്ലാതെ തന്നെ തുടങ്ങി, സാവധാനം ചുവടുറപ്പിച്ചു.

ഇടക്ക്‌ തട്ടുകേടുണ്ടായപ്പോള്‍ വൈക്കത്തപ്പനും കലൂരിലെ അന്തോനീസു പുണ്യാളനും പിന്നെ വാഴ്ത്തപ്പെട്ട ഗ്രെഗ്‌ ചാപ്പലും ഒന്നുപോലെ തുണയായി.

എന്തായാലും ഒടുവില്‍ മോഹനവര്‍മയുടെ നോവലില്‍ വിവരിക്കുന്നതുപോലെ മലയാളികള്‍ക്ക്‌ അഭിമാനിക്കാന്‍ ഒരു ദിവസമുണ്ടായി(ഏതു പട്ടിക്കും ഒരു ദിവസമുണ്ടെന്നാണല്ലോ സുരേഷ്‌ ഗോപി പറഞ്ഞത്‌).

നിര്‍ണായകമായ ഒരു മത്സരത്തിന്‍റെ ഗതി നിയന്ത്രിച്ച്‌ ഒരു മലയാളി ഇന്ത്യയെ വിജയതീരത്ത്‌ എത്തിക്കുന്ന ദിവസം. ജൊഹാനസ്ബര്‍ഗില്‍ ദക്ഷിണാഫ്രിക്കക്കെതിരായ ആദ്യ ടെസ്റ്റ്‌ പരമ്പരയില്‍ കത്തിക്കയറിയ ശ്രീശാന്ത്‌ മാന്‍ ഓഫ്‌ ദ മാച്ച്‌ ആയപ്പോള്‍ ഇനി ചത്താലും വേണ്ടില്ലെന്ന്‌ പറഞ്ഞ മലയാളികള്‍ അനവധിയാണ്‌.

ദക്ഷിണാഫ്രിക്കയില്‍വെച്ച്‌ പിച്ചില്‍ ബെല്ലി ഡാന്‍സ്‌ ചെയ്തും. ഹാശിം അംല പുറത്തായപ്പോള്‍ മൂക്കത്ത്‌ വിരല്‍വെച്ച്‌ കളിയാക്കിയും വിമര്‍ശനവും കയ്യടിയും നേടിയ ശ്രീശാന്ത്‌ നാട്ടില്‍ മടങ്ങിയെത്തിയശേഷം ലാറയുടെയും കൂട്ടരുടെയും തല്ലുകൊണ്ട്‌ പുളഞ്ഞത്‌ മറക്കാനാവില്ല. ഏകദിനത്തില്‍ നമ്മുടെ പയ്യന്‍റെ കാര്യം അത്ര ആശാവഹമല്ലെന്ന്‌ സാരം.

എതായാലും പയ്യന്‍ ടീമിലെത്തിയല്ലോ എന്ന്‌ ആശ്വസിക്കുന്നവര്‍ ഏറെയാണ്‌. പക്ഷെ അതുകൊണ്ടായില്ലല്ലോ. സഹതാരങ്ങള്‍ക്ക്‌ വെള്ളമെത്തിക്കുക. വിജയാഘോഷത്തിന്‌ നേതൃത്വം കൊടുക്കുക(ശ്രീശാന്ത് ബ്രേക്‌ ഡാന്‍സര്‍ എന്ന നിലയില്‍ ടീമിണ്റ്റെ ആഘോഷകമ്മിറ്റി കണ്‍വീനര്‍ കൂടിയാണെന്ന കാര്യം ഓര്‍ക്കുക) തുടങ്ങിയ ജോലികള്‍ക്കായിരിക്കില്ല ശ്രീശാന്തിനെ ടീമില്‍ എടുത്തതെന്ന്‌ വിശ്വസിക്കാം.

തലേവരയുടെ തിളക്കവും കഠിനാധ്വാനവും ആത്മവിശ്വാസവും(ഇടക്ക്‌ ചില മലയാളിത്തരങ്ങളും) ഒന്നുപോലെയുള്ളവരുടെ ഗണത്തിലാണ്‌ ശ്രീശാന്ത്‌. അതുകൊണ്ട്‌ ഈ പുലിക്കുട്ടി ലോകകപ്പില്‍ പുപ്പുലിയായി മാറുമെന്ന്‌ പ്രതീക്ഷിക്കാം. അങ്ങനെ നടക്കട്ടെ എന്ന്‌ പ്രാര്‍ത്ഥിക്കാം.

എന്നിട്ടു വേണം ഇന്ത്യന്‍ ക്രിക്കറ്റിന്‍റെ ചരിത്രത്തില്‍ ഏറ്റവും അധികം മാധ്യമ ശ്രദ്ധ നേടിയ താര ബന്ധുവായ സാവിത്രിദേവിയുടെ(ശ്രീശാന്തിന്‍റെ അമ്മ) മധുര പലഹാര വിതരണം ഒന്നുകൂടി കാണാന്‍



ഇന്ത്യന്‍ ടീം..
രാഹുല്‍ ദ്രാവിഡ്‌(ക്യാപ്റ്റന്‍), സച്ചിന്‍ ടെണ്ടുല്‍ക്കര്‍(വൈസ്‌ ക്യാപ്റ്റന്‍), സൌരവ്‌ ഗാംഗുലി, യുവരാജ്‌ സിംഗ്‌, മഹേന്ദ്രസിംഗ്‌ ധോണി, റോബിന്‍ ഉത്തപ്പ, അജിത്‌ അഗാര്‍ക്കര്‍, സഹീര്‍ ഖാന്‍, ഹര്‍ഭജന്‍ സിംഗ്‌, അനില്‍ കുംബ്ളെ, ദിനേശ്‌ കാര്‍ത്തിക്ക്‌, ഇര്‍ഫാന്‍ പഠാന്‍, മുനാഫ്‌ പട്ടേല്‍, വിരേന്ദര്‍ സെവാഗ്‌, എസ്‌. ശ്രീശാന്ത്‌.

Wednesday, December 20, 2006

മദീനയിലെ തലവെട്ട് (കണ്ണീര്‍ കഥകള്‍ വരുന്ന വഴി)

സൗദി അറേബ്യയിലെ മദീനയില്‍ പോലീസിന്‍റെ പിടിയിലാവുകയും മരണ ശിക്ഷക്ക് വിധിക്കപ്പെടുകയും ചെയ്ത ജോജോ ജോസഫ് എന്ന പ്രവാസിയുടെ കദന കഥ കേരളത്തില്‍ ഇന്ന് പുറത്തിറങ്ങിയ പത്രങ്ങളില്‍ നിറഞ്ഞു നില്‍ക്കുകയാണ്. ദേശീയ ദിനപത്രമെന്ന് അവകാശപ്പെടുന്ന ഹിന്ദു പോലും ഇക്കാര്യത്തില്‍ പിന്നോക്കം പോയില്ല. മംഗളം മാത്രമാണ് വസ്തുതയോട് അല്‍പ്പമെങ്കിലും അടുത്തു നില്‍ക്കുന്ന വാര്‍ത്ത പ്രസിദ്ധീകരിച്ചത്. മദീനയില്‍ പ്രതിനിധികളുള്ള പത്രങ്ങള്‍പോലും വസ്തുതകള്‍ അന്വേഷിക്കാതെ ജോജോയുടെ കദനകഥയില്‍ കണ്ണീര്‍ ചാലിക്കാന്‍ മത്സരിക്കുകയായിരുന്നു.
ജോജോയുടെ കഥയുടെ നിജസ്ഥിതി വ്യക്തമാക്കുന്നതിനുവേണ്ടി ഇന്നത്തെ(20-12-2006) മലയാളം ന്യൂസില്‍ പ്രസിദ്ധീകരിച്ച വാര്‍ത്ത ചുവടെ ചേര്‍ക്കുന്നു. മലയാളം ന്യൂസ് ഗള്‍ഫ് രാജ്യങ്ങളില്‍ മാത്രം പ്രസിദ്ധീകരിക്കുന്ന പത്രമായതിനാല്‍ കേരളത്തില്‍ അത്ഭുതകരമായ രക്ഷപ്പെടലിന്‍റെ കഥ വായിച്ച ബ്ലോഗ് കുടുംബാംഗങ്ങള്‍ക്കെങ്കിലും സത്യം മനസിലാക്കാന്‍ ഇത് ഉപകരിക്കുമെന്ന് കരുതുന്നു.

മദീനയിലെ തലവെട്ട്‌ നാടകം പരിഭ്രാന്തി പരത്തി
(മലയാളം ന്യൂസ് ഡിസംബര്‍ 20 ബുധന്‍)
ആലപ്പുഴ: പ്രവാസിയുടെ കടുത്ത ഭയവും കാള പെറ്റെന്നു കേട്ടപ്പോള്‍ കയറെടുത്ത രാഷ്ട്രീയ നേതാക്കളും ചേര്‍ന്ന്‌ സുഷ്ടിച്ച നാടകം നാട്ടിലും വിദേശത്തും ഏറെ നേരം പരിഭ്രാന്തി പരത്തി. മദീനയില്‍ വധശിക്ഷക്കു വിധേയനാക്കാനിരുന്ന മലയാളിയെ പ്രതിപക്ഷ നേതാവ്‌ ഉമ്മന്‍ചാണ്ടിയുടേയും മറ്റും ഇടപെടല്‍ കാരണം മോചിപ്പിച്ചു എന്നൊരു വാര്‍ത്തയാണ്‌ ഇന്നലെ ആലപ്പുഴയിലെ പത്രം ഓഫീസുകളിലെത്തിയത്‌.

കെ.പി.സി.സി സെക്രട്ടറി മാന്നാര്‍ അബ്ദുല്‍ ലത്തീഫ്‌ നേരിട്ടു വിളിച്ചു പറഞ്ഞതിനാല്‍ മുന്‍പിന്‍ നോക്കാതെ വാര്‍ത്ത കൊടുക്കാന്‍ ചിലര്‍ തയാറായി. വധശിക്ഷയില്‍ നിന്നു രക്ഷപ്പെട്ടയാളുടെ വീട്‌ പ്രതിപക്ഷ നേതാവു സന്ദര്‍ശിക്കുകയും ചെയ്തു.

എടത്വ മരിയാപുരം വടക്കേകുറ്റം ജോസഫിന്‍റെ മകന്‍ ജോജോ ജോസഫാണ്‌ നായകന്‍. തായിഫില്‍ ജോലി ചെയ്യുന്ന ഇയാള്‍ പ്രസവാനന്തരം ഹായിലില്‍ ആശുപത്രിയില്‍ കഴിയുന്ന ഭാര്യയെ കാണന്‍ പുറപ്പെട്ടതായിരുന്നു. ഹായിലില്‍ നഴ്സാണ്‌ ഭാര്യ ഷീബ. ലിമോസിന്‍ ഡ്രൈവറുടെ പിഴവു കാരണം നിരോധിത മേഖലയില്‍ ജോജോ പ്രവേശിക്കുന്നതോടെയാണ്‌ കഥയാരംഭിക്കുന്നത്‌. മിനിയാന്നായിരുന്നു ഇത്‌.

പോലീസ്‌ പിടികൂടി നിജസ്ഥിതി മനസ്സിലാക്കിയ ശേഷം ഇന്നലെത്തന്നെ ഇയാളെ വിട്ടയക്കുകയും ചെയ്തു. മദീന ഹജ്‌ മിഷന്‍ ഇന്‍ ചാര്‍ജും മലയാളിയുമായ മുസ്തഫയെ വിളിച്ചു വരുത്തിയാണ്‌ പോലീസ്‌ സംഭവിച്ചതെന്തെന്ന് മനസിലാക്കിയത്.

പരിഭ്രാന്തനായ ജോജോ പോലീസിന്‍റെ പിടിയിലായ ഉടന്‍ തന്നെ താന്‍ വധിക്കപ്പെടുമെന്നു ഭാര്യയോട്‌ ഫോണ്‍ ചെയ്തു പറയുകയും എങ്ങനെയെങ്കിലും രക്ഷപ്പെടുത്താന്‍ ശ്രമിക്കണമെന്ന്‌ അപേക്ഷിക്കുകയും ചെയ്തു. ഭയന്നു വിറച്ച ഷീബ വിവരം ഉടനെ കോട്ടയത്തുള്ള സഹോദരന്‍മാരെ അറിയിച്ചു. അവര്‍ ഉടനെ ഉമ്മന്‍ചാണ്ടിയെ കാണുകയും അദ്ദേഹം ഇന്ത്യന്‍ അംബാസിഡര്‍ മുതല്‍ പ്രധാനമന്ത്രിയുടെ ഓഫീസ്‌ വരെ ബന്ധപ്പെടുകയും ചെയ്തു.

ഇതൊന്നുമറിയാതെ ഇതിനകം മദീനയില്‍ പോലീസ്‌ ഇയാളെ മോചിപ്പിച്ചു കഴിഞ്ഞിരുന്നു. മോചന വാര്‍ത്തയും ഭാര്യാ സഹോദരന്‍മാര്‍ മുഖേനയാണ്‌ നാട്ടിലെത്തിയത്‌. ജോജോയുടെ എടത്വയിലെ വീട്ടിലേക്കു പുറപ്പെട്ട ഉമ്മന്‍ചാണ്ടിയാണ്‌ തന്നെ ഇക്കാര്യം അറിയിച്ചതെന്നും നേതാവിണ്റ്റെ ശ്രമഫലമായി നടന്ന മോചന വാര്‍ത്ത പത്രങ്ങളെ അറിയിക്കണമെന്നു തോന്നിയെന്നും മാന്നാര്‍ അബ്ദുല്‍ ലത്തീഫ്‌ പറയുന്നു.

എന്തു കുറ്റത്തിനായാലും പിടികൂടിയ ഒരാളെ പിറ്റേന്നു തന്നെ വിചാരണ കൂടാതെ തല വെട്ടാന്‍ പത്തു ലക്ഷത്തോളം മലയാളികള്‍ കഴിയുന്ന സൌദിയില്‍ നിയമമുണ്ടോ എന്നന്വേഷിക്കാന്‍ പോലും ഇവരാരും മിനക്കെട്ടില്ല. സ്വന്തം വീട്ടിലേക്ക്‌ ഫോണ്‍ ചെയ്ത്‌ കാര്യങ്ങള്‍ വിശദമായി അറിയിക്കാന്‍ മടിച്ച ജോജോ ഹായിലിലെത്തിയെങ്കിലും മൊബൈലില്‍ ബന്ധപ്പെടാന്‍ ഇയാളോ ഭാര്യ ഷീബയോ തയാറായില്ല.

എട്ടു വര്‍ഷമായി സൌദിയിലുള്ള ജോജോ താനുണ്ടാക്കിയ പുകിലുകളൊന്നും അറിയാതെ ഭാര്യയോടും കുഞ്ഞിനോടുമൊപ്പം ഹായിലിലുണ്ട്‌.
....................................................................

Saturday, December 09, 2006

സാക്ഷി കള്ളനാണേ കൂയ്‌.....


എല്ലാം കാണുന്നവന്‍....

കൈരളി ടീവിയിലെ സാക്ഷി എന്ന പരിപാടി സ്വയം വിശേഷിപ്പിക്കുന്നത്‌ ഇങ്ങനെയാണ്‌. സാക്ഷി എല്ലാം കണ്ടിരുന്നത്‌ കേരളം യു.ഡി.എഫ്‌ ഭരിച്ചിരുന്ന കാലത്ത്‌. സെക്രട്ടേറിയേറ്റിന്‍റെ ഇടനാഴികളില്‍ നിന്നുമുതല്‍ നാട്ടിന്‍പുറത്തെ ഓടകളില്‍നിന്നുവരെ സാക്ഷി അപ്രിയ സത്യങ്ങള്‍ തോണ്ടിയെടുത്തു.
കാമറാ ടെക്നിക്കുകളുടെയും(ടെക്നിക്ക്‌ എന്നു പറയാന്‍ ഉണ്ടോ എന്ന്‌ ചോദിക്കരുത്‌) രാമചന്ദ്രന്‍റെ സവിശേഷ ശബ്ദത്തിന്‍റെയും മേമ്പൊടിയോടെ അവ കണ്‍മുന്നിലെത്തിയപ്പോള്‍ ജനം കയ്യടിച്ചു പറഞ്ഞു- കൊള്ളാം യെവന്‍മാരെ സമ്മതിക്കണം!

സാക്ഷി കണ്ടെത്തിയതില്‍ അധികവും ഭരിക്കുന്നവരുടെ നെറികേടുകളായിരുന്നു. അമിത പബ്ളിസിറ്റിയില്‍ താല്‍പര്യമില്ലാത്ത സാക്ഷി പണ്ട്‌ ആരോ ചോദിച്ച കാര്യം ഇടക്കിടെ ആവര്‍ത്തിക്കും-സാക്ഷിക്കെന്താ കൊമ്പുണ്ടോ?

സര്‍ക്കാരിനെ നേര്‍വഴിക്കു നടത്തുന്നവരല്ലേ?- അവര്‍ക്ക്‌ കൊമ്പുണ്ടെന്ന്‌ സമ്മതിക്കാതെ പറ്റുമോ?പക്ഷെ ഭരണം മാറിയപ്പോള്‍ സാക്ഷിക്ക്‌ തിമിരം ബാധിച്ചു. പലതും കാണാനാവുന്നില്ല. കാണുന്നത്‌ മനസിലാകുന്നില്ല. അല്ലെങ്കിലും എത്ര മിടുക്കനാണെങ്കിലും ഒരു പ്രായം കഴിഞ്ഞാല്‍ തിമിരവും വെള്ളെഴുത്തുമൊക്കെ ഉണ്ടാവും. കറതീര്‍ന്ന ഭരണത്തിനുകീഴില്‍ കേരളം മാവേലി നാടുപോലെ മുന്നോട്ടു പോകുമ്പോള്‍ സര്‍ക്കാരിനെ എന്തിന്‌ വിമര്‍ശിക്കണം?.

എന്നു കരുതി പരിപാടി നിര്‍ത്താനാവുമോ? പ്രതിപക്ഷത്താണെങ്കിലും യു.ഡി.എഫിനെ നന്നാക്കുക തന്നെ. കൂടാതെ'വമ്പന്‍' അഴിമതികള്‍ നടത്തുന്ന കെ.എസ്‌.ആര്‍.ടി. സി ഡ്രൈവര്‍മാര്‍, നഗരസഭാ ജീവനക്കാര്‍ തുടങ്ങിയ 'ഉന്നതരെ' കൈകാര്യം ചെയ്യാനും ഇവിടെ മറ്റാരാണ്‌ ഉള്ളത്‌?

പറഞ്ഞു പറഞ്ഞ്‌ കാടുകയറിപ്പോയി. പറയാന്‍ വന്നത്‌ ഇതല്ല. നേരത്തെ നമ്മടെ കൈപ്പള്ളിയാശാന്‍ മലയാളം ടെലിവിഷന്‍ ചാനലുകളും ചലച്ചിത്ര സംവിധായകരും അന്യഭാഷകളിലെ ഹിറ്റ്‌ സംഗീതങ്ങള്‍ മോഷ്ടിക്കുന്നതിനെക്കുറിച്ച്‌ വിശദമായി എഴുതിയിരുന്നു. സാക്ഷിയുടെ ടൈറ്റില്‍ മ്യൂസിക്‌ കേട്ടുതുടങ്ങിയ കാലം മുതല്‍ ഇത്‌ പണ്ടെവിടെയോ കേട്ടതാണല്ലോ എന്ന്‌ ഒരു സംശയം തോന്നി. ഒത്തിരി ആലോചിച്ചിട്ടും പുടി കിട്ടിയില്ല. എങ്കില്‍ പിന്നെ നമ്മടെ തോന്നലാകുമെന്ന്‌ കരുതി ആശ്വസിച്ചു.

കാലം കടന്നുപോയപ്പോള്‍ ഈ മ്യൂസിക്ക്‌ കേള്‍ക്കുമ്പോള്‍ മലയാളിക്ക്‌ സാക്ഷിയെ ഓര്‍മ വരുന്ന നിലയിലെത്തി കാര്യങ്ങള്‍. സാക്ഷിയുടെ അണിയറക്കാരായ തിരുവനന്തപുരത്തെ എന്‍.ടി.വി ടെക്നോളജീസ്തന്നെ മറ്റു പല ചാനലുകളിലും പരിപാടികള്‍ നിര്‍മിക്കുന്നുണ്ട്.

മലയാള സിനിമയിലെ സംഗീത ചോരണത്തെക്കുറിച്ചും മറ്റു പല സര്‍ഗാത്മക മോഷണങ്ങളെക്കുറിച്ചും ഞെട്ടിപ്പിക്കുന്ന വിവരങ്ങള്‍ സാക്ഷിയും എന്‍.ടി.വിയുടെ മറ്റു പരിപാടികളും പുറത്തുകൊണ്ടുവന്നു. കൈരളി പീപ്പിളില്‍ ഇത്തരം മോഷ്ടാക്കളെ തുറന്നു കാട്ടുന്ന നുണക്കഥ എന്ന പ്രത്യേക പരിപാടിയും ഇവര്‍ തുടങ്ങി. ദോഷം പറയരുതല്ലോ, ഈ പരിപാടി നന്നായിരുന്നു. സിനിമാക്കാരെ വാഴ്ത്താനും ഏതു ഫ്ളോപ്പ്‌ സിനിമയുടെയും വിജയാഘോഷം നടത്താനും സമയം നീക്കിവെക്കുന്ന ടെലിവിഷന്‍ പരിപാടികള്‍ക്കിടയില്‍ നുണക്കഥ വേറിട്ടുനിന്നു. പക്ഷെ നുണക്കഥ അല്‍പ്പായുസായിരുന്നു. ഒരു സുപ്രഭാതത്തില്‍ അപ്രത്യക്ഷമായി. സിനിമക്കാരെ വിമര്‍ശിച്ച്‌ മാധ്യമങ്ങള്‍ക്ക്‌ പിടിച്ചു നില്‍ക്കാനാവില്ലല്ലോ?(ചിത്രഭൂമി മാസികയില്‍ ഏറെ കൊട്ടിഘോഷിച്ച്‌ തുടങ്ങി ആഴ്ച്ചകള്‍ക്കുള്ളില്‍ നിര്‍ത്തിയ വിചാരണ എന്ന പംക്തി മറ്റൊരു ഉദാഹരണം)

അങ്ങനെയിരിക്കെയാണ്‌ ഒരു അവധി ദിനത്തില്‍ കാസറ്റ്‌ കളക്ഷനിലെ ഏറ്റവും പഴക്കമുള്ള ചിലത്‌ കേള്‍ക്കാമെന്ന്‌ തീരുമാനിച്ചത്‌. അക്കൂട്ടത്തിലുണ്ടായിരുന്ന ബോണി എമ്മിന്‍റെ കസെറ്റുകളിലൊന്ന്‌ കറങ്ങിക്കൊണ്ടിരിക്കുമ്പോള്‍ ദാ വരുന്നു ഞാന്‍ അന്വേഷിച്ചു നടന്ന പഴയ സംഗീതം. എല്ലാം കണ്ടിരുന്ന, ഇപ്പോള്‍ കാഴ്ച്ച മങ്ങിയ സാക്ഷിയുടെ ടൈറ്റില്‍ മ്യൂസിക്‌
''കലിംബ ദേ ലൂനാ( Kalimba De Luna )..............''
അന്പട സാക്ഷി...! അപ്പോള്‍ എന്‍റെ തോന്നലായിരുന്നില്ല.
എന്‍.ടി.വിയിലെ പ്രതിഭകള്‍ കൂളായി ബോണി എം പാട്ടിന്‍റെ മ്യൂസിക്ക്‌ അടിച്ചു മാറ്റി സാക്ഷിക്ക്‌ അകമ്പടിയാക്കുകയായിരുന്നു. മോഷ്ടിച്ച സംഗീതംകൊണ്ട്‌ മേല്‍വിലാസം ഉണ്ടാക്കിയവര്‍തന്നെ സംഗീത മോഷണത്തെയും മറ്റും കുറ്റം പറയുന്നു. വാസവദത്തയുടെ ചാരിത്ര്യപ്രസംഗം എന്നല്ലാതെ എന്തുപറയാന്‍?.

ഞാന്‍ പരിസരം മറന്ന്‌ അറിയാതെ വിളിച്ചു പറഞ്ഞു.
''സാക്ഷി കള്ളനാണേ കൂയ്‌.................. ''

ചാനലില്‍ ഉള്ളവര്‍ക്ക്‌ സംഗീത അവബോധം കൂടുതലായതിനാല്‍ ഇതേക്കുറിച്ച്‌ അറിയില്ലായിരിക്കാം. പക്ഷെ പോപ്പും റോക്കും റാപ്പും ഉള്‍പ്പെടെ എല്ലാം അരച്ചു കലക്കി കുടിച്ചവരെന്നു നടിക്കുന്ന നമ്മള്‍ പ്രേക്ഷകരോ?
കൈപ്പള്ളിയാശാന്‍ പറഞ്ഞപോലെ വിഢികള്‍തന്നെ.

താഴെ കാണുന്ന ലിങ്കില്‍ പോയാല്‍ ഈ പാട്ട് ഡൗണ്‍ലോഡ് ചെയ്യാവുന്നതാണ്.

http://mp3splanet.com/en/song-Kalimba-De-Luna/1DAFE/

Wednesday, December 06, 2006

അടുപ്പില്‍ അവസാനിച്ച ക്രിസ്മസ്‌ കരോള്‍

.....ക്രിസ്മസ്‌ സ്പെഷ്യല്‍.....

ഡിസംബറെന്നു കേള്‍ക്കുമ്പോഴേ മനസൊന്നു തുള്ളിച്ചാടും.
അത്‌ പണ്ടേയുള്ള ഒരു ദൌര്‍ബല്യമാണ്‌. കുളിരാര്‍ന്ന പ്രഭാതങ്ങള്‍,
നക്ഷത്രങ്ങള്‍ കണ്ണു ചിമ്മുന്ന രാത്രികള്‍, ഇരവിനെ പകലാക്കുന്ന ക്രിസ്മസ്‌-പുതുവത്സ ആഘോഷങ്ങള്‍... ഇതൊക്കെ ഓര്‍ക്കുമ്പോള്‍ തുള്ളാത്ത മനവും തുള്ളിപ്പോകും.

ക്രിസ്മസ്‌ കരോള്‍ എന്നൊരു കലാപരിപാടിയെക്കുറിച്ച്‌ പലര്‍ക്കും അറിയാമായിരിക്കും. കരോള്‍ എന്നാല്‍ ഗാനം, സംഗീതം എന്നൊക്കെയാണ്‌ അര്‍ത്ഥം. വിളവെടുപ്പു പോലെയുള്ള ആഘോഷ പരിപാടികളോടനുബന്ധിച്ച്‌ നടത്തിയിരുന്ന സംഗീതാഘോഷമാണ്‌ ആദ്യകാലത്ത്‌ കരോള്‍ എന്ന്‌ അറിയപ്പെട്ടിരുന്നത്‌.
ആളുകള്‍ വൃത്താകൃതിയില്‍ കൂടി നിന്ന്‌ പാടിയിരുന്ന പാട്ടുകള്‍ക്ക്‌ ഫ്രഞ്ച്‌ ഭാഷയില്‍ കരോളര്‍ എന്നാണ്‌ പറഞ്ഞിരുന്നത്‌ ഇത്‌ ലോപിച്ച് കരോള്‍ ആയെന്നാണ് പറയപ്പെടുന്നത്. ക്രിസ്മസുമായി ബന്ധപ്പെട്ട കരോള്‍ പ്രചാരത്തിലായത്‌ 13ആം നൂറ്റാണ്ടിലാണെന്നാണ്‌ ചരിത്രം.

ക്രിസ്മസ്‌ കാലത്ത്‌ നമ്മുടെ നാട്ടില്‍ പലതരം കരോളുകള്‍ നടക്കാറുണ്ട്‌. കരോള്‍ മത്സരങ്ങള്‍ക്കും പഞ്ഞമില്ല. ജിംഗിള്‍ ബെല്‍സ്.., മേരീസ്‌ ബോയ്‌ ചൈല്‍ഡ്‌.., സൈലണ്റ്റ്‌ നൈറ്റ്‌... തുടങ്ങിയ വിഖ്യാത ക്രിസ്മസ്‌ ഗാനങ്ങള്‍ക്ക്‌ ഇന്നും ഒട്ടേറെ ആരാധകരുണ്ടെങ്കിലും സിനിമാ ഗാനങ്ങളുടെ ക്രിസ്മസ്‌ പാരഡികള്‍ക്കാണ്‌ കേരളത്തില്‍ കൂടുതല്‍ ജനപ്രീതി. ഇക്കാര്യത്തില്‍ ഞങ്ങളുടെ നാടും വ്യത്യസ്തമല്ല.

ക്രിസ്മസിന്‌ ആഴ്ച്ചകള്‍ക്കു മുമ്പേ നാട്ടില്‍ പല സംഘങ്ങളും കരോള്‍ പരിശീലനം തുടങ്ങും. അത്യധ്വാനം ചെയ്ത്‌ കരോള്‍ ഗാനങ്ങള്‍ എഴുതി ചിട്ടപ്പെടുത്തുന്നവര്‍ ഏറെയുണ്ടെങ്കിലും ഹിറ്റ്‌ സിനിമാ പാട്ടുകള്‍ തെരഞ്ഞെടുത്തശേഷം വരികളില്‍ ഉണ്ണീശോ, പുല്‍ക്കൂട്‌, കന്യാ മറിയം, നക്ഷത്രം തുടങ്ങിയ വാക്കുകള്‍ കയറ്റി (ഇന്‍റര്‍നെറ്റും ഈമെയിലും മൊബൈല്‍ ഫോണുമൊക്കെ ചേര്‍ത്ത്‌ തമിഴ്‌ സിനിമാ പാട്ടുകള്‍ ഉണ്ടാക്കുന്നതുപോലെ)സംഗതി ഒപ്പിച്ചെടുക്കുന്നവരും കുറവല്ല. ഇത്തരം പാരഡി കരോള്‍ പാട്ടുകളുടെ പുസ്തകങ്ങളും ഇപ്പോള്‍ വിപണിയില്‍ സുലഭമാണ്‌.

വീട്ടില്‍നിന്ന്‌ അധികം ദൂരെയല്ലാതെ മൂന്ന്‌ പള്ളികളുണ്ട്‌. പെന്തക്കോസ്ത്‌, സാല്‍വേഷന്‍ ആര്‍മി, സി.എസ്‌.ഐ എന്നീ വിഭാഗങ്ങളുടേത്‌. ഈ പള്ളികളില്‍ കരോളിനുവേണ്ടി എല്ലാ വര്‍ഷവും ചിട്ടയോടെയുള്ള തയാറെടുപ്പുകള്‍ നടത്തിയിരുന്നു. അതുകൊണ്ടുതന്ന അവരുടെ പാട്ടുകള്‍ വളരെ മികച്ചതായിരുന്നു. ഡിസംബര്‍ രണ്ടാം വാരം മുതല്‍ രാത്രികാലങ്ങളില്‍ അവരുടെ റിഹേഴ്സലുകള്‍ കേട്ട്‌ കിടക്കുമ്പോള്‍ ഉള്ളില്‍ ക്രിസ്മസ്‌ ആഘോഷത്തിണ്റ്റെ പെരുമ്പറ മുഴങ്ങുമായിരുന്നു.

പള്ളികള്‍ക്കു പുറമെ സംഘടനകളും ക്ളബുകളും(സാങ്കല്‍പികമാകാം) ഒക്കെ കരോള്‍ സംഘടിപ്പിക്കാറുണ്ട്‌. ഇതിനെ മാന്യമായ ഒരു രാത്രികാല പിരിവ്‌ പരിപാടിയായി കണ്ടിരുന്നവരും കുറവല്ല. രണ്ടു ഡ്രമ്മുകളും ഒരു പെട്രോ മാക്സും ഉണ്ടെങ്കില്‍ ആര്‍ക്കും കരോള്‍ നടത്താം. അല്‍പ്പം മോടി കൂട്ടണമെങ്കില്‍ സാന്താക്ളോസിന്‍റെ വേഷം കെട്ടിയ ഒരാളെ മുന്നില്‍ നിര്‍ത്താം. മുളന്തണ്ടുകൊണ്ട്‌ ഉണ്ടാക്കി, വര്‍ണ കടലാസ്‌ ഒട്ടിച്ച്‌, അകത്ത്‌ മണ്ണെണ്ണ വിളക്ക്‌ വെച്ച ഒരു നക്ഷത്രം തീവെട്ടി പോലെ പിടിക്കാനുണ്ടെങ്കില്‍ സംഗതി ഉഷാര്‍. അച്ചടി മഷി ഉണങ്ങാത്ത രസീത്‌ പുസ്തകം അനിവാര്യം.

സാധാരണ കരോള്‍ സംഘങ്ങളുടെ പര്യടനം ഡിസംബര്‍ 23 മുതല്‍ 25 വരെയുള്ള രാത്രികളിലാണ്‌. പിരിവ്‌ മാത്രം ഉദ്ദേശിക്കുന്നവരാണെങ്കില്‍ 23നു തുടങ്ങി, പുതുവത്സരം വരെ ആവാം(യേശു പിറന്ന വിവരം പരമാവധി ആളുകളെ അറിയിക്കണമല്ലോ?). വാറ്റു മുതല്‍ സ്കോച്ചുവരെയുള്ള 'ഇന്ധന'ങ്ങളുടെ ഊര്‍ജ്ജത്തില്‍ മുന്നേറുന്ന സംഘങ്ങളും ഇല്ലാതില്ല. ഇത്തരം 'കലാകാരന്‍മാര്‍'ക്കായി ഇടക്ക്‌ ഏതെങ്കിലും താവളത്തില്‍ രാത്രി ഭക്ഷണവും ക്രമീകരിക്കും. ഓരോ ദിവസത്തെയും പാട്ടു കഴിഞ്ഞാല്‍ ഡ്രമ്മിന്‍റെയുംപെട്രോ മാക്സിണ്റ്റെയും വാടക കഴിഞ്ഞുള്ള തുക തലയെണ്ണി വീതിക്കും. ആര്‍ക്കും സ്വന്തം വീട്ടുകാരോട്‌ സമാധാനം പറയേണ്ട, പോലീസിനെ പേടിക്കേണ്ട; എല്ലാം ഉണ്ണിയേശുവിനു വേണ്ടി-അത്യുന്നതങ്ങളില്‍ ദൈവത്തിനു സ്തുതി. ഭൂമിയില്‍ സന്‍മനസുള്ളവര്‍ക്ക്‌ സമാധാനം!

തല്ലിക്കൂട്ട്‌ സംഘങ്ങളുടെ പക്കല്‍ പാരഡി പാട്ടുകള്‍ പോലും സ്റ്റോക്ക്‌ ഉണ്ടാവില്ല. പിന്നെയോ? വായില്‍ വരുന്നത്‌ കോതക്ക്‌ പാട്ട്‌. "ഒരീശോ രണ്ടീശോ മൂന്നീശോ നാലീശോ അഞ്ചാറീശോ...."(ഏക്‌ ദോ തീന്‍... എന്ന പാട്ടിന്‍റെ ഏറ്റവും എളുപ്പത്തിലുള്ള കരോള്‍ രൂപം) തുടങ്ങിയ നിമിഷ സൃഷ്ടികളായിരിക്കും ഇക്കൂട്ടര്‍ തട്ടിവിടുക(പണ്ടൊരിക്കല്‍ നാഷണല്‍ സര്‍വീസ്‌ സ്കീമിണ്റ്റെ ക്യാമ്പില്‍നിന്നും ഇത്തരം ചില നിമിഷ സൃഷ്ടികളുമായി രാത്രികാല പിരിവിന്‌ ഇറങ്ങിയത്‌ ഓര്‍ക്കുന്നു).

കരോള്‍ സംഘങ്ങള്‍ ഒറിജിനലാണെങ്കിലും തല്ലിക്കൂട്ടാണെങ്കിലും വെറുംകയ്യോടെ തിരിച്ചയക്കുന്നത്‌ മര്യാദയല്ലല്ലോ. പണ്ടൊക്കെ രണ്ടു രൂപ മുതല്‍ അഞ്ചു രൂപവരെയാണ്‌ കൊടുത്തിരുന്നത്‌. പിന്നീട്‌ അത്‌ പടിപടിയായി ഉയര്‍ന്ന്‌ അടുത്ത കാലത്ത്‌ അമ്പതു രൂപ വരെയായി. കൂടുതല്‍ പാട്ടു പാടിച്ച്‌ വന്‍ തുക കൊടുത്ത്‌ ഹുങ്ക്‌ കാട്ടിയിരുന്ന പുതുപ്പണക്കാരും ഒരുകാലത്ത്‌ ഉണ്ടായിരുന്നു.

കരോള്‍ സംഘത്തിന്‍റെ കൊട്ടു കേള്‍ക്കുമ്പോള്‍ ഞങ്ങള്‍ കൂട്ടികള്‍ പിടഞ്ഞെണീക്കും; അവരെ വരവേല്‍ക്കാന്‍. അത്രക്കുണ്ടായിരുന്നു അന്നത്തെ ക്രിസ്മസ്‌ ജ്വരം.
മാത്രമല്ല പിറ്റേന്ന്‌ അയല്‍പക്കത്തെ കുട്ടികള്‍ ചോദിക്കും
''നിങ്ങളെ വീട്ടില്‍ ഇന്നലെ എത്ര കരോളുകാര്‍ വന്നു?''
എണ്ണം കുറഞ്ഞുപോയാല്‍ നാണക്കേടാണ്‌. ക്രിസ്മസ്‌ അവധി കഴിഞ്ഞ്‌ ചെല്ലുമ്പോള്‍ ആരുടെ വീട്ടിലാണ്‌ ഏറ്റവും കൂടുതല്‍ കരോള്‍ സംഘങ്ങള്‍ വന്നതെന്ന്‌ സഹപാഠികള്‍ക്കിടയിലും ഒരു കണക്കെടുപ്പുണ്ടാകും.

കരോള്‍ സംഘത്തിണ്റ്റെ പെട്രോമാക്സ്‌ വെളിച്ചം ഏതു ദിശയിലാണ്‌ നീങ്ങുന്നതെന്നറിയാന്‍ ജനലരികില്‍ കാത്തുനില്‍ക്കുമ്പോള്‍ അപ്പന്‍ പറയും.
"വഴിയെ പോകുന്നോരെ വിളിച്ചുകേറ്റാതെ പോയിക്കെടന്ന്‌ ഒറങ്ങു പിള്ളാരെ. ഇനീം പെറുക്കാന്‍ എന്‍റെ കയ്യില്‍ കാശില്ല"

എന്തുപറഞ്ഞാലും അപ്പണ്റ്റെ കയ്യില്‍ എന്തെങ്കിലും ഇല്ലാതിരിക്കുമോ? ഒടുവില്‍ കരോള്‍ സംഘം വീട്ടിലേക്കുള്ള വഴിയില്‍ കയറുമ്പോള്‍ അകത്തെ ഇരുട്ടില്‍ വീണ്ടും അപ്പന്‍റെ സ്വരം

"എണ്റ്റെ കയ്യിലുള്ള കാശ്‌ തീര്‍ന്നു. അവര്‍ക്ക്‌ രണ്ടു രൂപാ കൊടുത്താ മതി".

"അതു മോശാ...ആ ഉലുവാ ടിന്നിനകത്തൂന്ന്‌ പത്തു രൂപയെടുത്തു കൊട്‌...."കട്ടിലില്‍നിന്ന്‌ എഴുന്നേല്‍ക്കുന്നതിനിടെ അമ്മ പറയും.

ആശ്വാസമായി. ഞാന്‍ ഇരുട്ടില്‍തന്നെ അടുക്കളയിലേക്ക്‌ കുതിക്കും. അമ്മയുടെ താല്‍ക്കാലിക ഖജനാവു കൂടിയായ ഉലുവാ ടിന്നിന്‍റെ സ്ഥാനം എനിക്ക്‌ ഹൃദിസ്ഥമാണ്‌. രൂപയുമായി ഞാന്‍ വരുമ്പോഴേക്കും പെങ്ങള്‍ കതക്‌ തുറന്നിരിക്കും. രൂപ കയ്യില്‍ പിടിച്ച്‌ തെല്ലു ഗമയില്‍ ഞാന്‍ വാതില്‍ പടിയില്‍ നില്‍ക്കും. രണ്ട്‌ പാട്ടാണ്‌ സാധാരണ പാടുക. രണ്ടാമത്തെ പാട്ടു തുടങ്ങുമ്പോള്‍ സംഘത്തിലെ പണപ്പിരുവാകാരന്‍ മുന്നോട്ടു വരും ഞാന്‍ രൂപാ അയാള്‍ക്ക്‌ നീട്ടും. അയാള്‍ തിരിച്ച്‌ രസീതും.

ദാ... ന്നു പറയും മുമ്പ്‌ പരിപാടി കഴിയും. കരോള്‍ സംഘം മടങ്ങുമ്പോള്‍ മനസില്‍ ഒരു വിഷമം. പിന്നെ അടുത്ത സംഘത്തിന്‍റെ താളമേളങ്ങള്‍ക്കായി കാതോര്‍ക്കുകയായി.

കരോള്‍ സംഘത്തിന്‍റെ കാര്യം പറയുമ്പോള്‍ ജോയിയെക്കുറിച്ച്‌ പറയാതിരിക്കാനാവില്ല. ഞങ്ങളുടെ നാട്ടിലെ തൊഴില്‍ രഹിതരായ ചെറുപ്പക്കാരില്‍ ഒരാളാണ്‌ ജോയി. തൊഴില്‍ ഇല്ലെന്നു കരുതി ഉപജീവനത്തിനുള്ള വക ഇല്ലാതില്ല. അറിയപ്പെടുന്ന കലാകാരനല്ലെങ്കിലും കക്ഷിയുടെ മനസില്‍ ഒരു കലാകാരനുണ്ടായിരുന്നു. അതുകൊണ്ടുതന്നെയാണ്‌ എല്ലാ വര്‍ഷവും ക്രിസ്മസ്‌ വേളയില്‍ ജോയി മുന്‍കൈ എടുത്ത്‌ ഒരു കരോള്‍ സംഘം ഉണ്ടാക്കുന്നത്‌.

കുറെ ദിവസം പാട്ടും കൂത്തുമൊക്കെയായി ആഘോഷിക്കാം, മാത്രമല്ല ക്രിസ്മസ്‌ കരോള്‍ എന്നാല്‍ ആത്മീയതയുടെ പരിവേഷവുമുണ്ടല്ലോ?. ജോയിയുടെ കരോള്‍ സംഘത്തെ മുന്‍പ്‌ പറഞ്ഞ തട്ടിക്കൂട്ട്‌ വിഭാഗത്തില്‍ പെടുത്താവുന്നതാണ്‌. അന്ന്‌ ക്രിസ്മസ്‌ രാത്രിയായിരുന്നു. അവരുടെ കരോള്‍ പര്യടനം ഇരുപത്തിയഞ്ചോളം വീടുകള്‍ പിന്നിട്ടു. അടുത്ത വീട്ടില്‍ എത്താന്‍ നടപ്പാതയില്‍നിന്നും കല്‍പടവുകള്‍ കയറി അല്‍പ്പ ദൂരം നടക്കണം.

"നിങ്ങള്‍ പോയിട്ടു വാ.. ഞാന്‍ ഇവിടെ നില്‍ക്കാം" ജോയി പറഞ്ഞു.

അല്‍പ്പം വിശ്രമിക്കാന്നായിരുന്നു ജോയിയുടെ തീരുമാനം. സംഘാംഗങ്ങള്‍ അടുത്ത വീട്ടിലേക്ക്‌ പോയി. പെട്രോമാക്സ്‌ അകന്നപ്പോള്‍ ജോയി നിന്നിരുന്ന സ്ഥലത്ത്‌ നേരിയ നിലാവെളിച്ചം മാത്രം അവശേഷിച്ചു.

പോക്കറ്റില്‍നിന്ന്‌ ഒരു ബീഡി എടുത്ത തീകൊളത്തിയശേഷം ഒന്ന്‌ ഇരിക്കാന്‍ പറ്റിയ സ്ഥലത്തിനായി കക്ഷി ചുറ്റുപാടും നോക്കി. അല്‍പ്പം അകലെ ഇടവഴിയുടെ അരികില്‍തന്നെ വലിയൊരു പാറ. ബീഡിയില്‍നിന്ന്‌ ആദ്യ പുക എടുത്തുകൊണ്ട്‌ അവിടേക്ക്‌ നടന്നു. മുണ്ട്‌ പൊക്കി ഒതുക്കി വലതു കൈ പാറയില്‍ കുത്തി പുറകിലേക്ക്‌ നീങ്ങി ഇരുന്നു.

"എന്‍റമ്മച്ചിയേ.................... ''
ജോയിയുടെ അലര്‍ച്ചയില്‍ പരിസര പ്രദേശം നടുങ്ങി. രാഘവനും ഭാര്യയും മക്കളും ഞെട്ടി ഉണര്‍ന്നു. എന്താണ്‌ സംഭവിച്ചതെന്ന്‌ അറിയാതെ സ്തബ്ധനരായിരുന്ന അവര്‍ അടുക്കളയില്‍നിന്ന്‌ ഒരു ഞരക്കം കേട്ട്‌ അവിടേക്ക്‌ പാഞ്ഞു
"എന്‍റമ്മേ................. "
അടുപ്പിനു മുകളില്‍ അവശനിലയില്‍ കിടക്കുന്ന ജോയി. സമീപത്ത്‌ മണ്‍പാത്രങ്ങളും കുപ്പി ഗ്ളാസുകളും പൊട്ടിത്തകര്‍ന്ന്‌ കിടക്കുന്നു. തലേന്ന്‌ ബാക്കിവന്ന ചോറും കറിയും അടുക്കളയിലെമ്പാടും ചിതറിയിരിക്കുന്നു.ജോയിയുടെ മുഖത്തും ദേഹത്തും ചാരം. മണ്‍പാത്രത്തിന്‍റെയും ഗ്ളാസുകളുടെയും ചീളുകള്‍ കൊണ്ട്‌ കയ്യും പുറവും മുറിഞ്ഞിരിക്കുന്നു.
"ഇതെന്നാ എടപാടാ ജോയിക്കുഞ്ഞേ"
അടുപ്പിനു മുകളില്‍നിന്ന്‌ ജോയിയെ പിടിച്ചെഴുന്നേല്‍പ്പിക്കുന്നതിനിടെ രാഘവന്‍ ചോദിച്ചു.
"കരോളിന്‌ വന്നതാ... "

''എന്‍റെ കൂര പൊളിച്ചിട്ടാണോ കരോള്‌. കള്ളക്കടം മേടിച്ച്‌ കുത്തിക്കൂട്ടിയതാ എനി ഞാന്‍ എന്നാ ചെയ്യും?"

"പാറയാണെന്നു കരുതി ഇരുന്നതാ ചേട്ടാ.. മേല്‍ക്കൂരയാണെന്ന്‌ അറിഞ്ഞില്ല"

അര്‍ധ നഗ്നനായ ജോയിയോട്‌ അടുത്ത ചോദ്യം ഉന്നയിക്കുന്നതിനു മുമ്പേ രാഘവന്‍ കണ്ടു- മുകളില്‍ കഴുക്കോലില്‍ ഉടക്കി കിടക്കുന്ന വെള്ള മുണ്ട്‌. മുണ്ട്‌ എടുത്ത്‌ ജോയിക്ക്‌ കൈമാറുന്നതിനിടെ രാഘവന്‍ ഭാര്യയോടു കയര്‍ത്തു.

"നീ ഒറ്റയൊരുത്തിയാ ഇതിനൊക്കെ കാരണം. ഓല മേഞ്ഞാ മതീന്ന്‌ പല വട്ടം ഞാമ്പറഞ്ഞതാ. മോഡേണ്‍ റൂഫ്‌ ഇടാന്‍ നിനക്കല്ലാരുന്നോ നിര്‍ബന്ധം. കൂഴിലിരിക്കുന്ന വീടിന്‌ മോഡേണ്‍ റൂഫ്‌ ഇട്ടതിന്‍റെ ഇപ്പം അനുഭവിച്ചില്ലേ?"

Saturday, August 12, 2006

നീയല്ലാതാരുണ്ടെന്നുടെ പ്രണയപ്പുഴയില്‍ ചിറകെട്ടാന്‍.....

നീയല്ലാതാരുണ്ടെന്നുടെ പ്രണയപ്പുഴയില്‍ ചിറകെട്ടാന്‍.....
എന്നു തുടങ്ങുന്ന പഴയ പാട്ട്‌
ആര്‍ക്കെങ്കിലും അറിയുമോ?
അറിയാവുന്നവര്‍ ഒന്നു പോസ്റ്റണേ..........

Monday, July 17, 2006

kochuvarthamanam

ഉരുളക്കുപ്പേരി

ഒ. എന്‍. വിയുടെ ഒരു കവിത 10 പ്രസംഗത്തിനു തുല്യം
വി. എസ്‌ അച്യുതാനന്ദന്‍.
അച്യുതാനന്ദണ്റ്റെ ഒരു പ്രസംഗം 10 കവിതക്കും.

അഭിനയ ജീവിതത്തില്‍ കാട്ടിയ എറ്റവും വലിയ അബദ്ധമായിരുന്നു
ഗജനിയിലെ റോള്‍ സ്വീകരിച്ചത്‌. ക്യാമറയില്‍ എന്നെ മോശമായി ചിത്രീകരിക്കുകയായിരുന്നു.
നയന്‍താര

നിറയെ തുനിയുടുത്ത്‌ അഭിനയിച്ച ഒരാളെ തുണിയില്ലാതെ ചിത്രീകരിച്ച ആ ക്യാമറ കണ്ടുകെട്ടണം.

(കടപ്പാട്‌: ചിത്രഭൂമി ജൂലൈ 9-15)

Tuesday, July 04, 2006

കൊച്ചു വര്‍ത്തമാനം

ഒടുവില്‍ ഞാനും അതിന് നിര്‍ബന്ധിതിനായി-ബ്ലോഗിംഗിനേയ്.
ഹരിശ്രീ ഗണപതായേ നമ: